Upprættu glæpahring í falsfatabransanum

Spænska lögreglan hefur tilkynnt um að tekist hefði að uppræta starfsemi glæpahrings sem einsetti sér að falsa fatnað vinsælla vörumerkja og selja á Spáni. Rannsókn málsins teygði sig til Portúgal og gerði lögregla í samvinnu við þarlenda kollega sína áhlaup á fataverksmiðjur í norðurhluta Portúgal.

Alls var lagt hald á 235 tonn af fatnaði og níutíu og níu manns handteknir. 

Voru fötin fölsuð í þeim skilningi að sett voru vörumerki þekktra fataframleiðenda á fatnað sem framleiddur var í verksmiðjunum. Fötin voru svo flutt til Spánar og seld þar. Net sölunnar náði til Spánar í heild sinni og voru sérstakar deildir sem sáu um rekstur hvers landsvæðis fyrir sig. 

Glæpahringurinn er sagður eiga rætur sínar að rekja til Marokkó. Á meðal hinna handteknu voru tveir klerkar. Annar þeirra Marokkóskur og starfaði í mosku í bænum Xinzo de Limia á Spáni. Hann er sagður meðal höfuðpaura í málinu. Fékk moskan meðal annars framlag upp á 100.000 evrur frá glæpahringnum. 

Sagt er að glæpahringurinn hafi auðgast um 5,5 milljónir evra eða því sem nemur um 800 milljónum króna á tveimur árum.

Rannsókn á málinu hófst 2012 og meðal annars var gerð húsleit á 117 stöðum víðsvegar um Spán við rannsókn málsins. Samhliða var tíu verksmiðjum í Portúgal lokað. 

Meðal hinna handteknu voru 37 Senegalar, 34 Portúgalar, 19 Marokkómenn og níu Spánverjar.

• Blogga um frétt