Krókódíll með konu í kjaftinum

Flórídamaðurinn James Bullard varð vitni að óhugnanlegu atviki er hann sá fjögurra metra langan krókódíl í læk með lík konu í kjaftinum. Gerðist atvikið í Largo í Flórída-ríki í Bandaríkjunum.

„Ég kastaði steini í krókódílinn, bara til að sjá hvort þetta væri alvöru krókódíll,“ sagði Bullard í viðtali við fréttastofuna WFLA-TV á föstudaginn.

„Krókódíllinn hélt fast í líkið, hélt í neðri hluta búksins, og dró líkið með sér undir vatnið.“

Krókódíllinn hóf að draga pallbílinn

Bullard hljóp á slökkvistöð í nágrenninu og tilkynnti atvikið. Lögreglan mætti skömmu síðar og banaði krókódílnum, þó ekki án mótstöðu dýrsins.

„Þeir settu reipi um hálsinn á honum og tengdu reipið við krók á pallbíl. Þeir voru að draga hann inn en krókódíllinn byrjaði að draga bílinn í vatnið,“ sagði Bullard er hann lýsti aðgerð lögreglumannanna.

Eftir stutta stund náðu lögreglumenn svo valdi á krókódílnum og skutu hann til bana. Lögreglan hefur borið kennsl á lík konunar og var hún 41 árs gömul.

Verið er að rannsaka dánarorsök en ekki er vitað hvort krókódíllinn hafi orðið henni að bana eða fundið lík hennar.

• Blogga um frétt