Rússar vilja komast aftur í mannréttindaráð SÞ
Setja bókamerki
Rússar ætla að óska eftir inngöngu í mannréttindaráð Sameinuðu þjóðanna á nýjan leik í kosningum sem fara fram 10. október.
Rússar voru reknir úr ráðinu vegna innrásar þeirra í Úkraínu en vilja núna komast aftur þangað inn þegar kosið verður til næstu þriggja ára.
Breska ríkisútvarpið hefur gögn undir höndum sem sýna fram á þetta.
Í skjali sem Rússar hafa sent aðildarríkjum Sameinuðu þjóðanna kemur fram að þeir lofi að finna „viðunandi lausn á mannréttindamálum” og að þeir vilji koma í veg fyrir að mannréttindaráðið verði „verkfæri sem þjónar pólitískum vilja eins hóps ríkja”. Talið er að þar sé átt við Vesturlönd.
Erindrekar segja að Rússar vilji með þessu öðlast aukinn trúverðugleika á alþjóðlega vísu eftir að hafa verið sakaðir um mannréttindabrot í Úkraínu og innan eigin landamæra.
Að sögn BBC voru síðast lögð fyrir ráðið sönnunargögn um mannréttindabrot Rússa á mánudaginn í skýrslu sérstakrar rannsóknarnefndar.
Erik Mose, formaður nefndarinnar, sagði að í skýrslunni væru enn fleiri sönnunargögn um stríðsglæpi Rússa, þar á meðal pyntingar, nauðganir og árásir á almenna borgara.
Mannréttindaráð SÞ er staðsett í Genf í Sviss og eru aðildarríkin 47 talsins. Hvert þeirra er kosið til þriggja ára í senn. Í næstu kosningum í október munu Rússar etja kappi við Albaníu og Búlgaríu um tvö laus sæti ráðsins sem eru tekin frá fyrir þjóðir frá Mið- og Austur-Evrópu.
/frimg/1/45/78/1457879.jpg){kind=small}
