Stærsti skjálfti í 40 ár

Jarðskjálfti af stærðinni 4,2 reið yfir Campi Flegrei-svæðið vestur af Napólí á Ítalíu í nótt.

Þetta er stærsti skjálfti sem mælst hefur á þessu svæði í 40 ár að sögn sérfræðinga en skjálftinn olli engum slysum eða skemmdum að sögn almannavarna á svæðinu.

Skjálftinn reið yfir klukkan 3.35 í nótt að staðartíma. Upptök hans voru á aðeins um þriggja kílómetra dýpi og fannst hann víða í Napóli. Campi Flegrei er feiknastórt eldfjall þótt það sé flatt frekar en keilulaga.

Gæti stafað af auknu gasstreymi

„Þetta er stærsti skjálftinn undanfarin 40 ár. Það er mögulegt að það komi öflugri skjálftar á næstunni,“ sagði Mauro Di Vito, yfirmaður Jarðeðlis- og eldfjallafræðistofnunar Ítalíu, við AFP-fréttaveituna. Hann sagði fyrr í þessum mánuði að hann teldi að aukin virkni gæti stafað af auknu gasstreymi frekar en kviku, sem gerði líkur á eldgosi frekar litlar.

Hálf milljón manna býr á Campi Flegrei-svæðinu en síðast gaus þar árið 1538.

• Blogga um frétt