„Velkominn heim Frank!“

Þrír geimfarar, tveir rússneskir og einn bandarískur, hafa snúið aftur til jarðar eftir árslanga geimför.

Geimfararnir þrír eyddu árinu í Alþjóðlegu geimstöðinni (ISS) en geimstöðin er á sporbraut um jörðu. Geimstöðin er samstarfsverkefni fimm geimferðastofnana: Bandaríkjanna, Brasilíu, Evrópu, Japan og Rússlands. 

„Velkominn heim Frank!“ sagði NASA- geimstofnunin á Twitter, er Rubio ásamt rússnesku geimförunum snéri heim eftir meira en ár í geimnum. AFP

Skemmdir lengdu ferðina um 6 mánuði

Geimferðastofnun Rússlands, Roskosmos, sagði geimfarana Sergei Prokópjev, Dmitrí Petelín og Francisco Rubio hafa lent rétt fyrir utan borgina Jezkazgan í Kasakstan í dag.

Mennirnir þrír ferðuðust með rússneska geimfarinu Soyuz til Alþjóðlegu geimstöðvarinnar á síðasta ári, en áætlað var að leiðangurinn yrði um sex mánuðir.

Þegar nær fór að draga að heimferð uppgötvaðist þó leki á geimfarinu, en talið er að loftsteinn hafi skollið á utanverðu geimfarinu og valdið skemmdum. Þurfti Rússland því að senda annað geimfar, án áhafnar, til að sækja geimfarana þrjá.

Dmitrí Petelín, annar rússnesku geimfaranna. Mennirnir voru strax bornir til læknisskoðunar við lendingu. AFP

Lengsta geimferðin komin að lokum

Segir í tilkynningu Roskomos að Soyuz MS-23-geimfarið hafi lent klukkan 11.17 að íslenskum tíma.

Segir einnig í tilkynningunni að Prokópjev og Petelín hafi eytt 370 dögum, 21 klukkustund og 22 mínútum í geimnum, í lengsta geimflugi í sögu ISS. 

Bandaríska geimstöðin NASA staðfesti einnig lendingu geimfarana með stuttri tilkynningu á samfélagsmiðlinum X, áður þekktum sem Twitter. 

„Velkominn heim Frank! Lengsta geimferð geimfara NASA til þessa er komin að lokum. Frank Rubio er aftur á jörðu niðri eftir 371 dag,“ segir í tísti NASA.

• Blogga um frétt