Vill „rífa plásturinn af“ og reka McCarthy
Setja bókamerki
Einn af harðlínumönnum Repúblikanaflokksins segist ætla að leggja fram tillögu um að bola Kevin McCarthy, samflokksmanni sínum, úr stöðu forseta fulltrúadeildar Bandaríkjaþings, fyrir að semja um tímabundið fjárlagafrumvarp sem innihélt ekki tillagðan niðurskurð repúblikana.
Bráðabirgðafjárlög voru samþykkt á Bandaríkjaþingi í gær, aðeins nokkrum klukkustundum fyrir upphaf nýs fjárlagaárs. Allt stefndi í að ríkisstofnunum yrði lokað ef sátt næðist ekki á þinginu. Bráðabirgðafjárlögin tryggðu starfsemi ríkisstofnanna í 45 daga, eða til 17. nóvember.
Í fjárlögunum er ekki að finna stuðning Bandaríkjamanna við Úkraínumenn líkt og Joe Biden forseti hafði krafist. Biden undirritaði samt sem áður fjárlögin og sagðist í yfirlýsingu fullviss um að McCarthy myndi standa við loforð sitt um stuðninginn.
Repúblikanar höfðu þó óskað eftir enn meiri niðurskurði á ríkisútgjöldum.
Rífa plásturinn af
Það var Kevin McCarthy, leiðtogi repúblikana í fulltrúadeild, sem lagði fram frumvarpið en harðlínuflokksmenn repúblikana höfðu sumir hótað því að fjarlæga McCarthy úr stöðu sinni sem leiðtogi þingflokksins.
„Ég ætla mér að leggja fram þingsályktunartillögu sem felst í því að McCarthy fari frá embætti í vikunni,“ segir Matt Gaetz, þingmaður Repúblikanaflokksins, við bandaríska miðilinn CNN.
„Ég held að við þurfum að rífa plásturinn af.“
Segja má að Gaetz sé einn helsti forystumaður í þeim litla hópi harðlínurepúblikana sem ollu pattstöðunni í ríkistjórninni í vikunni. Harðlínuflokksmennirnir neituðu lengi að samþykkja nýtt fjárlagafrumvarp þar sem það innihélt ekki eins víðtækan niðurskurð og þeir hefðu viljað.
Hópurinn varð því afar reiður þegar McCarthy samdi um nýtt bráðabirgðafrumvarp við demókrata í gærkvöldi sem innihélt litlar breytingar á ríkisútgjöldum.
Demókratar gætu hjálpað McCarthy
„Ég held að við þurfum að halda áfram undir nýrri forystu sem hægt er að treysta á,“ sagði hann við CNN en bendir einnig á að demókratarnir gætu kosið gegn því að bola McCarthy úr leiðtogastöðu sinni, með tilliti til þess að hann hafi hjálpað við að koma í veg fyrri að ríkisstofnanir lokuðu.
„Eina leiðin fyrir McCarthy til að vera enn forseti fulltrúadeildar í lok vikunnar er ef demókratar hjálpa honum,“ segir hann. „Nú munu þeir örugglega gera það.“
Sumir þingmenn demókrata hafa sagst ætla að hjálpa McCarthy að halda stöðu sinni. Aftur á móti hefur Alexandria Ocasio-Cortez, þingkona Demókrata, sagst „algjörlega“ ætla að kjósa með því að McCarthy fari úr embætti. Það sé „ekki á ábyrgð demókrata að bjarga repúblikönum frá sjálfum sér.“
/frimg/1/44/9/1440967.jpg){kind=small}
