Erlent | AFP | 14.1.2025 | 12:10

Allt að 100% skattar á íbúðir útlendinga á Spáni

Fleiri en 27 þúsund aðilar utan ESB hafi keypt eignir á Spáni árið 2023, ekki til þess að búa í, heldur til þess að græða á að sögn Sánchez. AFP

Spánn hyggst leggja allt að 100% skatt á eignir keyptar af erlendum aðilum frá löndum utan Evrópusambandsins.

Pedro Sánchez, forsætisráðherra Spánar, tilkynnti í gær um tólf áform ríkisstjórnarinnar til að mæta því neyðarástandi sem ríkir á húsnæðismarkaðinum þar í landi.

Orðnir þreyttir á breskum ferðamönnum

Aðrar lausnir lutu m.a. að því að auka félagslegt húsnæði, bæta regluverk á leigumarkaði, auka öryggi og stuðning við leigjendur, herða regluverk og hækka skatta á skammtímaleiguíbúðir.

„Það er ekki sanngjarnt að einhver sem á þrjár, fjórar eða jafnvel fimm íbúðir í skammtímaleigu borgi lægri skatta heldur en hótel,“ sagði Sánchez.

Banna skammtímaleigu til ferðamanna

Forgangsraða íbúum á Spáni

Benti hann á að fleiri en 27 þúsund aðilar utan ESB hafi keypt eignir á Spáni árið 2023, ekki til þess að búa í, heldur til þess að græða á.

„Sem við getum augljóslega ekki unað við í ljósi þess húsnæðisskorts sem við stöndum frammi fyrir,“ sagði Sánchez og bætti við að með sköttuninni væri hægt að forgangsraða því að íbúar á Spáni eigi þak yfir höfuðið.

„Vesturlöndin standa nú frammi fyrir afgerandi áskorun: Að verða ekki að sundruðu samfélagi sem er skipt upp í tvær stéttir: ríka leigusala og fátæka leigjendur.“

Sánchez útskýrði ekki nánar hvernig eða hvenær fyrirhuguð sköttun myndi raungerast, en hann hefur áður átt í erfiðleikum með að ná meirihluta á þingi til að kjósa með frumvörpum sínum.