Gera árás á sama tíma og heimsókn Starmers stendur yfir

Hljóð frá sprengingum og loftvarnarflautum ómuðu um Kænugarð í morgun er Rússar gerðu atlögu að úkraínsku höfuðborginni með drónum.

Árásin er gerð á sama tíma og Keir Starmer, forsætisráðherra Breta, er í sinni fyrstu opinberu heimsókn í Kænugarði til að árétta stuðning Bretlands við Úkraínu.

Vítalí Klitsjkó, borgarstjóri Kænugarðs, staðfesti árásina við fjölmiðla í morgun. Þá hvatti hann íbúa til að halda sig í skýlum.

Í umfjöllun Sky News segir að enginn hafi særst í árásinni.

Eyðilegging í Kænugarði vegna innrásarstríðsins blasir víða við. AFP

Hundrað ára samningur til að árétta stuðning

Starmer tók við embætti forsætisráðherra Bretlands í júlí. Hann hefur fundað sjö sinnum með Volodimír Selenskí Úkraínuforseta en þetta er í fyrsta sinn sem hann leggur leið sína til Kænugarðs.

Í heimsókninni mun ráðherrann meðal annars heimsækja hermenn sem hafa særst í átökunum við Rússland. Þá mun hann undirrita nýjan hundrað ára samning þar sem staðfastur stuðningur Breta við Úkraínu er áréttaður. 

• Blogga um frétt