Gíslar verða látnir lausir samkvæmt vopnahléssamningi Hamas-samtakanna og Ísraels. Vekur það vonir um að hægt verði að koma í veg fyrir frekari stórátök í stríðinu.

Breska ríkisútvarpið greinir frá. 

Unnið með sáttasemjurum í Kaíró

Benjamín Netanjahú, forsætisráðherra Ísraels, fyrirskipaði hersveitum sínum í gær að safnast saman við Gasa. Sagði hann að ef Hamas myndi ekki frelsa gísla fyrir hádegi á laugardaginn yrði vopnahléssamningnum rift. 

Ham­as-sam­tök­in til­kynntu fyrir þremur dögum að þau ætluðu að slá á frest frels­un gísla vegna meintra brota Ísra­els­manna á vopna­hlés­sam­komu­lag­inu og hef­ur Don­ald Trump Banda­ríkja­for­seti varað við því að allt fari til hel­vít­is ef gísl­arn­ir verði ekki látn­ir laus­ir úr haldi.

Fulltrúar á vegum Hamas hafa tekið þátt í viðræðum í Kaíró í Egyptalandi og segja nú að sáttasemjarar frá Egyptalandi og Katar hafi staðfest að löndin muni hjálpa til við að koma í veg fyrir hindranir svo að samningurinn muni enn standa. 

Ísrael hefur þó ekki tjáð sig.

Vilja fá hjólhýsi og byggingarbúnað til Gasa 

Í yfirlýsingu frá Hamas segir að í viðræðunum hefði verið einblínt á að allir skilmálar samningsins yrðu uppfylltir, þá sérstaklega í sambandi við afhendingu hjólhýsa, tjalda, byggingarbúnaðar, læknisbirgða og eldsneytis. 

Var þá tekið fram í yfirlýsingunni að tónninn í viðræðunum væri jákvæður og að sáttasemjarar hafi fallist á að koma til móts við samtökin. 

Ríkismiðill Egyptalands, Al Jazeera, greindi svo frá því í dag að Egyptaland og Katar hefðu náð að koma í veg fyrir hindranir á milli Hamas og Ísraels og að vopnahléssamningurinn yrði áfram virtur. 

Einnig var því haldið fram að hjólhýsi yrðu send til Gasa ásamt byggingarbúnaði. 

Segja að vörurnar verði ekki sendar

Ísraelskir miðlar hafa hins vegar neitað því og sagt að um falsfréttir sé að ræða. Var það svo staðfest af talsmanni ríkisstjórnar Ísraels að engin hjólhýsi yrðu send á svæðið og ekki heldur byggingarbúnaður. 

Sam­kvæmt vopna­hlés­samn­ingi Ísra­els og Ham­as, sem tók gildi 19. janú­ar, ber Ham­as að sleppa 33 ísra­elsk­um gísl­um á fyrstu 42 dög­um vopna­hlés­ins. Aft­ur á móti verða Ísra­els­menn að sleppa 1.900 föng­um úr ísra­elsk­um fang­els­um.

Tengdar fréttir

Ísrael/Palestína

Samþykktu vantrauststillögu á hendur ríkissaksóknara

• Nauðsynlegt að Hamas láti af völdum
• Tíu fórust í árásum Ísraelshers í nótt
• Árásir hafnar aftur „af fullum krafti“
• „Leikreglurnar hafa breyst“: Hóta að opna hlið vítis

» Fleiri tengdar fréttir

• Blogga um frétt