Gæti hitt Pútín „mjög fljótlega“ til að ræða stríðið
Setja bókamerki
Donald Trump Bandaríkjaforseti segist geta hitt Vladimír Pútin Rússlandsforseta „mjög fljótlega“ til að ræða hvernig megi binda enda á Úkraínustríðið.
Lét hann þessi orð falla skömmu eftir að greint var frá því að fulltrúar Bandaríkja og Rússlands myndu funda í Sádi-Arabíu á næstu dögum um hvernig binda mætti enda á stríðið. Úkraínumenn verða ekki viðstaddir þær viðræður enda var þeim ekki boðið, að sögn BBC.
„Enginn tími settur en það gæti verið mjög fljótlega,“ sagði Trump við blaðamenn í dag spurður út í það hvenær hann hugsaði sér að hitta Pútín. Trump kvaðst vinna hörðum höndum við að ná friði í Úkraínu og sagðist trúa að bæði Pútín og Volodimír Selenskí Úkraínuforseti vildu stöðva orrustuna.
Uppnám í Evrópu
Uppi er fótur og fit í Evrópu vegna áforma Trumps um Úkraínustríðið. Emmanuel Macron Frakklandsforseti hefur boðað helstu leiðtoga álfunnar á neyðarfund vegna áforma Trumps og hefst fundurinn á morgun.
Á fundinum verða leiðtogar frá Frakklandi, Bretlandi, Þýskalandi, Póllandi, Ítalíu, Spáni og Danmörku, sem myndu vera fulltrúar Eystrasaltsríkja og Skandinavíu, að því er Reuters-fréttastofan greinir frá.
Marco Rubio, utanríkisráðherra Bandaríkjanna, er nú á leiðinni til viðræðna í Sádi-Arabíu en Reuters hefur eftir honum að Úkraína og hin Evrópuríkin fái að taka þátt í „alvöru viðræðunum“ að því gefnu að þessar viðræður skili árangri.
Erlendir þjófar stela frá gestum á Þingvöllum
Óttast að mörg hundruð séu látnir í Mjanmar
Blaðamenn verjast árásum
Play Europe fær flugrekstrarleyfi á Möltu
Silja Bára næsti rektor Háskóla Íslands
Kínverska sendiráðið gagnrýnir íslensku lögregluna
Pútín sagður gefa í skyn að Trump vilji Ísland