Erlent | mbl | 13.4.2025 | 9:45 | Uppfært 14.4.2025 11:38

Tugir féllu í árás Rússa

Rússar gerðu eldflaugaárás á borgina Sumy í Úkraínu í dag. AFP

Rússnesk eldflaugaárás á miðborg Súmí í Úkraínu í dag varð að minnsta kosti 21 að bana og særði 83, þar af sjö börn.

Artem Kobzar, starfandi borgarstjóri í Súmí , sem er staðsett í norðausturhluta Úkraínu, segir að að minnsta kosti 20 manns hafi látist í flugskeytaárás Rússa.

„Á þessum bjarta degi, pálmasunnudegi, varð samfélag okkar fyrir hræðilegum harmleik og því miður vitum við um 20 dauðsföll,“ skrifar borgarstjórinn á samfélagsmiðilinn Telegram.

Úkraínskur björgunarmaður að slökkva eld á vettvangi eldflaugaárásarinnar í Sumy. AFP

Margt fólk hafði safnast saman í miðborginni til að fagna á pálmasunnudegi þegar eldflaugaárásin átti sér stað.

Volodimír Selenskí Úkraínuforseti tjáði sig einnig um árásina á Telegram og kallaði eftir viðbrögðum frá Bandaríkjunum, Evrópu og öllum heiminum sem vilja binda enda á stríð og morð.

„Rússar vilja einmitt svona hryðjuverk og draga stríðið á langinn,“ skrifar Selenskí en rússneski herinn hefur enn ekki tjáð sig um árásina.