Erlent | mbl | 14.4.2025 | 16:09 | Uppfært 15.4.2025 17:28

Ástæða fyrir drápi mæðgna ráðgáta

Líklega verður aldrei ljóst hvað manni á þrítugsaldri gekk til þegar hann skaut mæðgurnar Anne Grimstad, 51 árs, og Elinu Jeanette, 17 ára, til bana á heimili þeirra í Lindesnes í mars ofanverðan. Þá vitneskju tekur hann með sér í gröfina þar sem hann stytti sér aldur á bílastæði um tuttugu kílómetra frá vettvangi að ódæðinu loknu. Ljósmynd/Úr einkasafni

Lögreglunni í Agder-fylki í Noregi er það hulin ráðgáta hvaða ástæður bjuggu að baki voveiflegu drápi mæðgnanna Anne Grimstad og sautján ára gamallar dóttur hennar, Elinu Jeanette, en mæðgurnar fundust skotnar til bana á heimili sínu í Vigeland í Lindesnes þar í fylkinu að morgni mánudagsins 31. mars.

„Eins og málið horfir við okkur nú verðum við að búa okkur undir það að fá aldrei botninn í það hver ástæða þessara drápa var,“ segir Tove Haugland, ákæruvaldsfulltrúi lögreglunnar í Agder, í samtali við norska ríkisútvarpið NRK.

Segir hann lögregluna ekki munu velta sér frekar upp úr því hvað manni á þrítugsaldri gekk til með því að skjóta þær mæðgur til bana í marslok og sé það meðal annars af tillitssemi við aðstandendur. Sjálfur verður ódæðismaðurinn, maður á þrítugsaldri frá Austur-Agder, hvorki knúinn skýringa né reikningsskila gjörða sinna þar sem hann fannst látinn á bílastæði í um tuttugu kílómetra fjarlægð frá vettvangi og hafði stytt sér aldur með sama skotvopni og varð mæðgunum að aldurtila.