Skemmdarverk unnin á styttu af Mandela

Mótmælendur í Bretlandi unnu skemmdarverk á sjö styttum, þar á meðal styttu af baráttumanninum Nelson Mandela. Skemmdarverkin unnu þeir til að mótmæla niðurstöðu Hæstaréttar Bretland, sem nýverið komst að þeirri niðurstöðu að hugtakið kona vísaði til líffræðilegs kyns.

Breska dagblaðið Telegraph greinir frá. 

Styttur af Sir Robert Peel, Benjamin Disraeli og baráttukonunni Millicent Fawcett voru meðal þeirra styttna sem voru skemmdar af mótmælendum á mótmælafundi á Þingtorginu á laugardag, að sögn lögreglu.

Lögreglan í Lundúnum segir að hún hafi opnað sakamálarannsókn vegna skemmdarverkanna.

Frétt af mbl.is

Orðið kona vísi til líffræðilegs kyns

Farage vill gerendurna í 10 ára fangelsi

Þúsundir manna gengu um miðborg Lundúna í gær í svokallaðri „neyðarmótmælagöngu“ gegn dómi Hæstaréttar á miðvikudag.

Niðurstaða Hæstaréttar, sem hefur orðið til þess að margar opinberar stofnanir hafa þurft að endurskoða stefnu sína í kynjajafnréttismálum, kveður á um að lög gegn mismunun á grundvelli kyns eigi aðeins við um líffræðilegar konur en ekki trans konur.

Nigel Farage, leiðtogi Reform UK, sagði við The Telegraph:

„Þú getur ekki sett frekari varnir í kringum stytturnar, en þetta fólk ætti að fara í fangelsi í að lágmarki 10 ár og afplána þau 10 ár.“

Lögreglan skoðar kvartanir vegna skilta

Lögreglan greindi frá því að hún væru að fást við fjölda kvartana frá almenningi vegna skilta og mynda sem deilt var á samfélagsmiðlum og höfðu að sögn verið sýnd á mótmælunum á laugardag.

Gangan í Lundúnum var ein af mörgum sem fóru fram víða um Bretland til stuðnings réttindum trans fólks í kjölfar dóms Hæstaréttar.

Lögreglan sagði að engar handtökur hefðu enn verið gerðar. Stuart Bell, yfirlögregluþjónn sem stýrði aðgerðum lögreglunnar vegna mótmælanna, sagði:

„Skemmdarverk og eignaspjöll sem þessi eiga ekki heima á götum Lundúna og skemma umhverfið fyrir bæði íbúum og gestum. Þó að lögreglan styðji rétt almennings til að mótmæla, þá er glæpsamlegt athæfi sem þetta tilgangslaust og óásættanlegt. Við erum að vinna í málinu og munum grípa til aðgerða gegn þeim sem bera ábyrgð.“

• Blogga um frétt