Mangione lýsti sig saklausan
Setja bókamerki
Luigi Mangione, sem hefur verið ákærður fyrir morðið á Brian Thompson, forstjóra stærsta sjúkratryggingafyrirtækis Bandaríkjanna, lýsti sig saklausan af ákærum alríkisins í dag er hann var leiddur fyrir dóm í New York.
Mangione er ákærður bæði fyrir ríkisdómstól í New York og í alríkisdómstól fyrir morðið. Hann hefur nú lýst sig saklausan í báðum málum, og því verða tvö aðskilin réttarhöld.
Gæti fengið dauðarefsingu
Verði hann sakfelldur fyrir ríkisdómstólnum gæti hann átt yfir höfði sér lífstíðardóm án möguleika á reynslulausn.
Verði Mangione fundinn sekur fyrir alríkisdómstólnum mun kviðdómur ákvarða hvort mæla eigi með dauðarefsingu.
Dagsetning réttarhalda kynnt í desember
Breska ríkisútvarpið greinir frá því að verjendur Mangiones hafi óskað eftir því að réttarhöld fyrir alríkisdómstólnum fari fram fyrst, þar sem möguleiki er þar á dauðarefsingu, en búið var að ákveða að réttarhöld ríkisdómstólsins yrðu á undan.
Þá tilkynnti dómari málsins réttinum að næsta þinghald yrði í desember og verður þá dagsetning réttarhaldanna kynnt.
Fágætissalur opnaður í Eyjum
„Ég er ógeðslega glaður“
Í fjöruna, í berjamó og upp á fjöll
„Undarlegt ef það yrði ekki stýrivaxtalækkun“
Hafnar öllu tali um að hafa haft áhrif á útboðið
Sér fyrir endann á 25 ára sameiningarferli spítalanna
Telur verndartolla njóta stuðnings