15 létust í hótelbruna

Í það minnsta 15 fórust í eldsvoða á hóteli í indversku borginni Kolkata að sögn lögregluyfirvalda á staðnum.

Nokkrum var bjargað úr herbergjum og af þaki hótelsins og þá náðu nokkrir að klöngrast út um glugga og upp á þak áður en þeim var bjargað.

Manoj Verma, lögreglustjóri í Kolkata, segir við AFP-fréttaveituna að tala látinna sé komin í 15 og þar af eru tvö börn. Um tugur manna hlaut brunasár og var fluttur á nærliggjandi sjúkrahús.

Rannsókn er hafin á upptökum eldsins á hótelinu en Verma segir að hótelið hafi breyst í hálfgerðan gasklefa og svo virðist að margir hafa kafnað.

88 hótelgestir voru á Rituraj-hótelinu þegar eldurinn kom upp en það er staðsett í viðskiptahverfi í miðbæ Kolkata.

• Blogga um frétt