Embla Líf Hreinsdóttir, dýralæknanemi í Valensía á Spáni, var á hlaupabrettinu heima á stúdentagörðunum þegar rafmagnið sló skyndilega út á þriðjudag og brettið stöðvaðist snögglega undir fótum hennar.

„Ég var sem betur fer að halda mér í þegar það stoppaði. Annars hefði ég örugglega bara flogið á hausinn,“ segir hún í samtali við mbl.is. 

Fyrst kippti hún sér reyndar lítið upp við rafmagnsleysið, þar sem varaflsstöð fór í gang á stúdentagörðunum og ljósin kviknuðu aftur. Hún lét því sem ekkert hefði í skorist.

Í raun komst Embla ekki að því hve víðtækt rafmagnsleysið var fyrr en um þremur korterum síðar, þegar áhyggjufull móðir hennar hringdi til að athuga hvort allt væri í lagi.

Þá loks kveikti hún á fréttunum og komst að því að slokknað hafði á gervöllu landinu.

Óvissan verst

Embla var heppin, að eigin sögn, þar sem varaflsstöðin dugaði í örfáa tíma og netið í byggingunni virkaði því einnig. En á endanum slokknaði allt þar líka.

Þegar hún reyndi að ná sambandi við vini sína reyndist það erfitt, enda flestir straum- og sambandslausir. „Maður náði ekki sambandi við neinn,“ segir hún. 

„Það var í raun óvissan sem var óþægilegust. Maður vissi í raun ekkert hvenær rafmagnið myndi koma aftur,“ bætir Embla við.

Hún býr í miðborg Valensía og stundar nám við CEU, en í borginni allri býr um ein og hálf milljón manna. Hún ákvað að kíkja aðeins út.

Frétt af mbl.is

„Þetta var ógeðslegt“

Nutu rafmagnsleysisins í sólbaði

„Það var fyndið að sjá mismunandi viðbrögð hjá fólki. Sumir voru að reyna að komast inn í búðir að reyna að kaupa vatn,“ segir hún. „Svo voru aðrir, sem sátu bara úti í sólbaði að tjilla.“

Það var mikið umferðaröngþveiti enda voru öll umferðarljós óvirk, en umferðin í borginni er þegar afar mikil. Hún ákvað svo að halda sig heima.

Embla segir gærdaginn aftur á móti hafa verið tiltölulega venjulegan. Hún hafi komist með lestinni í skólann, sem hafi tekið furðulega stuttan tíma að koma aftur í gang eftir rafmagnsleysið. Sumir samnemendur hennar sem voru á leiðinni heim úr páskafríi hafi þó verið strand í öðrum landshlutum þar sem flugferðum þeirra var frestað.

Orsökin óljós

Óljóst er hvað olli rafmagnsleysinu en for­svars­menn spænska raf­orku­kerf­is­ins úti­loka netárás.

Spænsk yf­ir­völd reyna enn að kom­ast til botns í mál­inu. Pedro Sanchez, for­sæt­is­ráðherra Spán­ar, hef­ur biðlað til al­menn­ings að forðast að dreifa röng­um og vill­andi upp­lýs­ing­um um málið.

Edu­ar­do Prieto, sem er fram­kvæmda­stjóri Red Electrica sem sér um flutn­ings­kerfi raf­magns í land­inu, seg­ir að sam­kvæmt þeirra grein­ingu þá sé hægt að úti­loka netárás.

Frétt af mbl.is

Spánverjar útiloka netárás á raforkukerfið

Tengdar fréttir

Víðtækt rafmagnsleysi á Spáni og í Portúgal

Fleiri daga þarf til að greina orsök rafmagnsleysisins

• Rafmagnsleysið hafði áhrif á Grænlendinga
• Dró fingur eftir hálsi sér
• „Samfélögin fóru aftur til miðalda á augabragði“
• „Þetta var ógeðslegt“

» Fleiri tengdar fréttir

• Blogga um frétt