Erlent | AFP | 30.4.2025 | 15:35

Samdráttur vestanhafs vegna ofurtolla Trumps

Tollastríð Trumps við flest ríki heims skilaði sér í efnahagssamdrætti fyrsta ársfjórðung hans á valdastóli. AFP

Samdráttur mældist í bandarísku hagkerfi fyrsta fjórðung ársins sem markaði upphaf setu Donalds Trumps forseta á valdastóli. Birta fjölmiðlar vestanhafs fregnir af samdrættinum í dag og skýra hagfróðir menn með stórauknum innflutningi til Bandaríkjanna dagana og vikurnar áður en tollar forsetans gagnvart öllum öðrum ríkjum tóku gildi.

Dróst landsframleiðsla þessa stærsta hagkerfis heims saman um 0,3 prósent á ársgrundvelli fyrsta fjórðung ársins í kjölfar aukningar um 2,4 prósent á ofanverðu ári 2024, ef marka má bráðabirgðaútreikninga viðskiptaráðuneytis Bandaríkjanna, nokkuð sem rækilega stingur í stúf við spár um 0,4 prósenta aukningu þennan fyrsta ársfjórðung.

Birtust tölurnar á 101. embættisdegi Trumps frá innsetningu hans 20. janúar að telja, en tollahótanir forseta frá því snemma árs ollu óðasölu á fjármálamörkuðum sem skapaði glundroða sem ekki á sér hliðstæðu síðan í heimsfaraldrinum.

Sjaldnast afdrifaríkar afleiðingar

„Ekki er vanalegt að stefna ríkisstjórnar færi með sér afdrifaríkar breytingar, sérstaklega ekki á fyrstu hundrað dögum nýs forseta,“ sagði Tara Sinclair, hagfræðiprófessor við George Washington-háskóla, við AFP-fréttastofuna áður en tölurnar voru gerðar heyrumkunnar og bætti því við eftir á að augljóst væri að stórfelldar stefnubreytingar hefðu höggvið að rótum bandarísks efnahags.

Þegar ljóst tók að verða í hvað stefndi nú fyrr í apríl tilkynnti Trump-stjórnin um 90 daga hlé á hæstu innflutningstollum og lét þess í stað tíu prósenta grunntoll nægja gagnvart flestum ríkjum er sætt höfðu svimandi tollahækkunum samkvæmt upphaflegri ákvörðun Trumps.