Erlent | AFP | 6.5.2025 | 15:05

Ísrael gerði loftárás á flugvöll í Jemen

Herþotum var miðað á Sanaa, höfuðborg Jemen sem er í höndum uppreisnarmanna Húta. AFP/Mohammed Huwais

Ísraelski herinn segist í yfirlýsingu hafa gert flugvöllinn í Jemen „algerlega óvirkan“, í hefndarskyni fyrir eldflaugaárás Húta á alþjóðaflugvöll Ísraels.

Herþotur gerðu árás á Sanaa, höfuðborg Jemen sem er í höndum uppreisnarmanna Húta, sem njóta stuðnings frá Íran.

Segir í yfirlýsingu frá ísraelska hernum að Hútar hafi notað flugvöllinn til að flytja vopn og verkamenn og að flugbrautir, flugvélar og innviðir á flugvellinum hafi skemmst í árásinni ásamt þremur orkuverum í höfuðborginni og steypuverksmiðju í Amran.

Frétt af mbl.is

Hútar heita fleiri árásum á flugvelli

„Ef þið yfirgefið ekki svæðið eruð þið í hættu“

Skömmu fyrir árásina birti ísraelski herinn færslu á X þar sem óbreyttir borgarar voru hvattir til að flýja flugvöllinn og halda sig frá svæðinu.

„Ef þið yfirgefið ekki svæðið eruð þið í hættu,“ skrifaði Avichay Adraee, talsmaður hersins, á arabísku.

Ísrael réðst einnig á aðra steypuverksmiðju og skipahöfn í Hodeida í gær. Að minnsta kosti fjórir létust í þeirri árás og 35 slösuðust.

Hútar kenna Ísrael og Bandaríkjunum um allar nýlegar árásir. Ísrael hefur tekið ábyrgð en Bandaríkin neita fyrir að hafa tekið nokkurn þátt í árásum gærdagsins.