Erlent | mbl | 7.5.2025 | 23:37 | Uppfært 8.5.2025 12:58

Vill aðstoða Indland og Pakistan við að ná sáttum

„Þetta er svo hræðilegt,“ sagði Bandaríkjaforseti. AFP

Donald Trump Bandaríkjaforseti hvatti stjórnvöld í Indlandi og Pakistan til að komast að sáttum svo koma megi í veg fyrir frekari átök milli ríkjanna í dag. Kveðst forsetinn vilja aðstoða ríkin til að ná sáttum.

„Þetta er svo hræðilegt. Ég kann vel við báða aðila og vil sjá þá leysa þetta. Ég vil sjá þá hætta,“ sagði Trump í dag um átök Indlands og Pakistans.

Stjórnvöld á Indlandi hófu í gær flugskeytaárásir á níu svæði í Pakistan, ýmist innan landamæra Pakistans eða á yfirráðasvæði Pakistans í Kasmírhéraði. Á fimmta tug eru sagðir hafa látið lífið í árásunum.

Frétt af mbl.is

Tugir fallnir í árásum Indverja og Pakistana

Trump kveðst vera til staðar

Indland og Pakistan hafa átt í áralangri deilu en samband ríkjanna hefur farið versnandi að undanförnu eftir banvæna hryðjuverkaárás á ferðamenn á yfirráðasvæði Indlands í Kasmír. Indversk stjórnvöld segja pakistönsk stjórnvöld bera ábyrgð á árásinni en pakistönsk stjórnvöld neita því.

Pakistan hefur lengi verið mikilvægur bandamaður Bandaríkjanna í hernaðarmálum en Trump hefur upp á síðkastið reynt að efla samband sitt við Narendra Modi, forsætisráðherra Indlands. Hann kom t.a.m. í opinbera heimsókn í Hvíta húsið í febrúar.