Erlent | AFP | 8.5.2025 | 23:33 | Uppfært 23:53

„Mjög góður maður, mjög hlédrægur“

Robert Francis Prevost, nú Leó XIV, er fæddur í Chicago í Bandaríkjunum. Hann var kjörinn páfi kaþólsku kirkjunnar í dag og fögnuðu því um 40.000 manns á Péturstorgi í Vatikanínu.

Leó starfaði í mörg ár sem trúboði í Perú og var þar gerður að erkibiskupi. Tímabil hans sem erkibiskup í Perú var þó litað af ásökunum um að hylma yfir ásakanir um kynferðislega misnotkun, sem biskupsdæmi hans hefur síðan hafnað.

Í aðdraganda páfakjörsins var hann sagður búa yfir mörgum góðum eiginleikum fyrir páfadóm en hann væri líklega of ungur, enda aðeins 69 ára að aldri.

Fyrir tveimur árum valdi Frans páfi Leó til að koma í stað kanadíska kardínálans Marc Ouellet, og gaf honum það verkefni að velja næstu kynslóð biskupa.

Sem nýr páfi stendur hann nú frammi fyrir örlagaríku verkefni. Auk þess að verða rödd siðferðisins á flóknum heimsvettvangi dagsins í dag verður hann að reyna að sameina kirkjuna og takast á við brennandi málefni eins og áframhaldandi afleiðingar kynferðisofbeldismálsins.

Frétt af mbl.is

Nýr páfi er frá Bandaríkjunum

Leó páfi er sagður geta verið brú á milli ólíkra heima. AFP/Tiziana Fabi

Leó geti verið brú milli ólíkra heima

Kardinálaráðið er sagt hafa tjáð löngun í að næsti páfi yrði einhver sem haldið gæti áfram með arfleifð Frans páfa, um að ná til og taka utan um jaðarhópa, ásamt því að ná til hópa innan kirkjunnar, þar með talda þá sem voru ekki eins hrifnir af Frans páfa.

Þegar gengið var inn í páfakjörið var Leó talinn geta uppfyllt það hlutverk - maður sem gæti verið brú milli ólíkra heima.

Sú staðreynd að páfakjörið komst að niðurstöðu á aðeins fjórum umferðum atkvæðagreiðslu bendir til þess að kardínálarnir hafi verið sammála þessu mati.

AFP/Tiziana Fabi

„Mjög góður maður, mjög hlédrægur“

Leó páfi var því álitinn líklegur arftaki Frans páfa.

Presturinn James Martin lýsti honum sem „alveg niðri á jörðinni“ og „mjög góður maður, mjög hlédrægur“.

Þá sagði Faðir Vito Crincoli að páfar sem borið hafa nafnið Leó hafi upp til hópa reynst mjög vel.

„Ef sagan er skoðuð, þá hafa Leóar reynst góðir páfar,“ sagði hann.

„Eins og Leó XIII, hann elskaði fólkið sitt. Hann elskaði fólkið sitt. Fólkið sitt áleit hann sem menn, ekki vélar. Framlag mannsins endurspeglaði virðuleika hans.

Við vitum þetta ekki enn, en það verður virkilega áhugavert að vita hvers vegna hann valdi nafnið Leó.“

AFP/Tiziana Fabi

Ekki skylda að taka sér páfanafn

Þó að páfar séu ekki skyldugir til að breyta nafni sínu hefur hver einasti páfi undanfarin 470 ár gert það og yfirleitt valið nafn forvera síns til að heiðra viðkomandi og gefa í skyn að þeir ætli að fylgja fordæmi hans.

Frans páfi var merkileg undantekning, því að hann valdi ekki nafn fyrrverandi páfa heldur St. Frans frá Assisi, prests á 13. öld sem var mikill verndari dýraríkisins og umhverfisins.

AFP/Alberto Pizzoli

Trump fagnaði bandarískum páfa

Sem kardínáli hafði nýi páfinn varið jaðarhópa og deilt greinum á netinu sem gagnrýndu stefnu Donalds Trump Bandaríkjaforseta gegn innflytjendum, en Trump fagnaði engu að síður kosningu hans.

„Hamingjuóskir til kardinálans Robert Francis Prevost, sem var rétt í þessu kjörinn páfi,“ skrifaði Trump á samfélagsmiðla.

„Þvílíkur heiður að hann sé fyrsti bandaríski páfinn. Þvílík spenna, og þvílíkur heiður fyrir landið okkar.“

AFP/Andrej Isakovic

Biskup á að ganga með fólkinu sem hann þjónar

„Biskup á ekki að vera lítill prins sitjandi í konungsríki sínu, heldur er hann kallaður á einlægan hátt til að vera auðmjúkur, vera nálægt fólkinu sem hann þjónar, ganga með því og þjást með því,“ sagði Leó páfi við Vatican News í október 2024.

Þetta styður við orð David B. Tencer, biskups kaþólsku kirkjunnar á Íslandi, en í samtali við mbl.is sagðist hann gleðjast yfir nýjum páfa, sérstaklega vegna reynslu hans frá fyrri störfum.

„Hann var yfirmaður í biskupadeildinni, hann var kardínálinn sem var ábyrgur fyrir henni. Þannig þekkir hann fyrst og fremst marga biskupa um allan heim en hann veit líka hvernig það er að vera biskup af því að hann var sjálfur biskup í Perú.

Þetta er reynsla sem gerir honum kleift að skilja alla, ekki bara fólkið í kringum hann,“ sagði David.