Fresta tollunum um 90 daga

Bandarísk og kínversk yfirvöld tilkynntu í morgun að þau hefðu náð samkomulagi um að draga tímabundið úr þeim íþyngjandi tollum sem ríkin hafa lagt hvort á annað í tilraun til að draga úr viðskiptastríði ríkjanna sem hefur ógnað þessum tveimur stærstu hagkerfum heims.

Í sameiginlegri yfirlýsingu ríkjanna kemur fram að þau muni fresta tollum í 90 daga til að skapa svigrúm fyrir samningaviðræður.

Frétt af mbl.is

Öldur virðist lægja í tollastríðinu á Kyrrahafi

Sameiginlegir hagsmunir

Samkvæmt samkomulaginu munu Bandaríkin lækka toll á kínverskum innflutningi niður í 30 prósent úr núverandi 145 prósentum, á meðan Kína mun lækka innflutningsgjöld sín á bandarískum vörum niður í 10 prósent úr 125 prósentum.

„Við komumst að þeirri niðurstöðu að við höfum sameiginlegra hagsmuna að gæta,“ sagði Scott Bessent, fjármálaráðherra Bandaríkjanna, á blaðamannafundi í Genf í morgun þar sem bandarískir og kínverskir embættismenn hittust um helgina.

„Þessi ákvörðun er í þágu beggja landa og sameiginlegra hagsmuna heimsins,“ sagði í tilkynningu frá kínverska viðskiptaráðuneytinu. Þá sagði sömuleiðis að kínversk yfirvöld vonast til að Bandaríkin muni halda áfram að vinna með Kína „til að leiðrétta ranga framkvæmd einhliða tollahækkana“.

Bandaríkjadalurinn, sem féll eftir að Trump hóf tollastríð sitt í apríl, hefur styrkst eftir að þetta var tilkynnt. 

Viðskiptadeilan milli Kína og Bandaríkjanna hefur valdið óróa á fjármálamörkuðum og vakið ótta um að tollarnir muni endurvekja verðbólgu og valda alþjóðlegri efnahagslægð.

• Blogga um frétt