Trump hyggst lækka lyfjakostnað um 59 prósent

Donald Trump, forseti Bandaríkjanna sagði í tilkynningu í dag að hann myndi láta lækka lyfjaverð í Bandaríkjunum um 59 prósent. 

„Lyfjaverð lækkar um 59 prósent plús! Eldsneyti, orka, matvörur og allir aðrir kostnaðarliðir lækka. Engin verðbólga!!!“ skrifaði Trump á samfélagsmiðla í kjölfar tilkynningarinnar.

Tilkynningin kemur fram eftir að hann sagðist á sunnudag ætla að lækka verð á lyfseðilsskyldum lyfjum „næstum samstundis" á milli 30-80 prósent. 

Bætti hann einnig við að hann muni skrifa undir forsetatilskipun nú í dag.

Breytingar á verðlagningu lyfjanna

Til viðbótar við þessa breytingu ætlar Trump að setja á svokallaða „bestu kjarareglu“ sem passar upp á að lyf sem seld eru í Bandaríkjunum verði á pari við lægsta verð á sömu lyfjum annars staðar í heiminum. 

Sagði hann jafnframt að lækkunin á kostnaði lyfjanna gæti valdið hækkunum á kostnaði í öðrum löndum. 

„Bestu kjarareglan“ er regla á vegum Alþjóðaviðskiptastofnunar sem hefur það markmið að draga úr mismunun milli landa og viðskiptaaðila þeirra. Þetta er gert til að koma á jöfnum samkeppnisskilyrðum í alþjóðaviðskiptum. 

Ætlaði sér að lækka verðið seinast

Þetta er ekki í fyrsta skipti sem Donald Trump hefur reynt að lækka lyfjakostnað í Bandaríkjunum en það reyndi hann fyrst á sínu fyrsta kjörtímabili árin 2017-2021. 

Þá lenti hann í miklu mótlæti frá lyfjaiðnaðinum og fór það því ekki í gegn þá. 

Í síðasta mánuði undirritaði forsetinn framkvæmdatilskipun til þess að lækka lyfjaverð og veita ríkjum meira svigrúm til að leita af hagstæðum verðum erlendis og bæta samningarferlið við verðlagningu á lyfjum. 

• 1 blogg um fréttina

Bloggað um fréttina

• Geir Ágústsson: Hagfræði stjórnmálanna