Erlent | AFP | 13.5.2025 | 23:59

Afnemur refsiaðgerðir gegn Sýrlandi

Trump tilkynnti þetta í heimsókn sinni í Sádí-Arabíu. AFP/Brandan Smialowski

Donald Trump Bandaríkjaforseti tilkynnti fyrr í dag að hann hygðist láta af refsiaðgerðum gegn Sýrlandi. Stjórnvöld í Sýrlandi fagna ákvörðuninni.

Trump er staddur í Sádi-Arabíu í sinni fyrstu opinberu heimsókn erlendis síðan hann tók við embætti á ný í janúar.

„Ég mun fyrirskipa að hætt verði við refsiaðgerðir gegn Sýrlandi til að gefa þeim tækifæri til að ná miklum árangri,“ sagði forsetinn í ræðu í dag.

Utanríkisráðuneyti Sýrlands fagnaði tilkynningu Trumps og kallaði hana „vendipunkt fyrir sýrlensku þjóðina.”

Fagnaðarlæti brutust út í Damaskus eftir að Trump tilkynnti um ákvörðun sína. AFP/Bakr Alkasem

Refsingarnar settar á tímum Assad

„Afnám þessara refsiaðgerða býður upp á mikilvægt tækifæri fyrir Sýrland til að sækjast eftir stöðugleika, sjálfbærni og marktækri enduruppbyggingu þjóðarinnar, undir forystu Sýrlands og fyrir sýrlensku þjóðina,“ sagði í yfirlýsingu sýrlenska utanríkisráðuneytisins.

Síðan að Bashar al-Assad var steypt af stóli í desember hafi nýju íslömsku stjórnvöldin í Sýrlandi hvatt vestræn ríki til að falla frá refsiaðgerðum, sem voru settar á laggirnar í Assad.

„Þessar refsiaðgerðir voru settar á fyrri stjórnvöld vegna glæpa sem þau frömdu, og þau stjórnvöld eru farin,“ sagði Ahmed al-Sharaa, forseti Sýrlands, á blaðamannafundi með Emmanuel Macron Frakklandsforseta í síðustu viku.

„Með því að fjarlægja stjórnvöldin þá ættu þessar refsiaðgerðir einnig að vera fjarlægðar. Það er engin réttlæting fyrir því að viðhalda refsiaðgerðunum,“ bætti hann við.