Fjöldi hælisleitenda margfaldast

Hælisleitendum í Bretlandi hefur fjölgað allverulega síðastliðin ár. Umsækjendur um hæli í Bretlandi voru 84.200 árið 2024 en þeir voru að meðaltali 27.500 á árunum 2011 til 2020.

Keir Starmer, forsætisráðherra Bretlands, kynnti fyrr í dag að hafnar væru formlegar viðræður við önnur ríki um að taka við þeim umsækjendum um hæli sem þegar hefðu fengið synjun á umsókn sinni í Bretlandi.

Stefna Starmers í útlendingamálum hefur breyst síðastliðna daga en hann tilkynnti í upphafi vikunnar að tilraun Breta með opin landamæri væri lokið. Hann telur nú að Bretland gæti orðið að „eyju ókunnugra“ ef útlendingalöggjöf verður ekki hert strax.

Frétt af mbl.is

Starmer: Tilraun með opnum landamærum lokið

Lágt hlutfall af innflytjendum eru hælisleitendur

Þrátt fyrir að hælisleitendum hafi fjölgað umtalsvert eru þeir samt sem áður ekki nema 11% af öllum innflytjendum í Bretlandi árið 2024. Hlutfallið hefur þó hækkað um nær helming á fimm árum en árið 2019 var prósentan sex prósent.

Mikill fjöldi þeirra sem sækja um hæli í Bretlandi kemur til landsins yfir Ermarsundið frá Frakklandi á litlum bátum. Á árunum 2018 til 2024 er talið að 148.000 manns hafi náð til stranda Bretlands á þennan hátt en af þeim sóttu nær allir um hæli, eða 95%.

Flestir þeirra sem sækja um hæli í Bretlandi koma frá Pakistan og Afganistan.

Útlendingamál eru í brennidepli í Bretlandi og hefur það haft áhrif á hið pólitíska landslag, til að mynda hefur fylgi Umbótaflokksins aukist verulega og vann flokkurinn vel á keppinauta sína í nýafstöðnum sveitastjórnarkosningum.

• Blogga um frétt