Erlent | AFP | 16.5.2025 | 14:06

Friðarfundi slitið í Istanbúl

Frá fundinum í dag. Hakan Fidan, utanríkisráðherra Tyrklands, er hér fyrir miðju. Sendinefnd Úkraínu er til vinstri og sú rússneska til hægri. AFP/Utanríkisráðuneyti Tyrklands

Fundi Úkraínumanna og Rússa í Istanbúl á Tyrklandi er lokið. Var um að ræða fyrstu beinu friðarviðræðurnar á milli ríkjanna í meira en þrjú ár.

Fundurinn hófst um klukkan 10.40 í morgun og lauk 90 mínútum síðar.

Mögulegt er að annar fundur verði haldinn í dag en hann er ekki á dagskrá, að því er AFP-fréttaveitan hefur eftir heimildarmanni sínum sem er háttsettur úkraínskur embættismaður að sögn.

„Ef þeir fá aðrar leiðbeiningar frá Moskvu, þá er mögulegt að eitthvað gerist í dag,“ sagði heimildarmaðurinn eftir að viðræðunum lauk og bætti við að eins og er væri ekki búið að skipuleggja annan fund.

Frétt af mbl.is

Friðarfundur Rússlands og Úkraínu hafinn

Volodimír Selenskí Úkraínuforseti á fundi hins pólitíska bandalags Evrópuríkja (e. European Political Community eða EPC) í Tírana í Albaníu í dag. AFP/Ludovic Marin

Vill refsa Rússum ef viðræður skila ekki árangri

Volodimír Selenskí Úkraínuforseti hefur kallað eftir öflugum aðgerðum vestrænna ríkja gegn Rússlandi, þar á meðal nýjum þvingunaraðgerðum, ef friðarviðræðurnar í Istanbúl skila ekki árangri.

„Við höfðum raunverulegt tækifæri til að taka mikilvæg skref í átt að því að binda enda á þetta stríð ef aðeins Pútín hefði ekki verið hræddur við að koma til Tyrklands,“ sagði Selenskí við evrópska leiðtoga sem voru saman komnir í Tírana í Albaníu í dag.

„Ef í ljós kemur að rússneska sendinefndin er í raun bara til sýnis og getur ekki skilað neinum árangri í dag... þurfa að verða öflug viðbrögð, þar á meðal þvingunaraðgerðir gegn orkugeira Rússlands og bönkum,“ sagði hann.