Erlent | mbl | 17.5.2025 | 17:42

Myndir: Búbblur snemma í morgun og allir í þjóðbúning

Sverre Magnus prins, Ingrid Alexandra prinsessa, Mette-Marit krónprinsessa og Hákon krónprins heilsa upp á yngstu landa sína í Asker suðvestan við Ósló á þjóðhátíðardegi Norðmanna í dag. AFP/Lise Aaserud

Norðmenn fagna þjóðhátíðardegi sínum í dag og að venju með pompi og prakt. Það var á þessum degi árið 1814 sem frændur okkar fengu sína fyrstu stjórnarskrá.

Frændur okkar taka þjóðhátíðardag sinn alvarlega og nær allir klæðast þjóðbúningi í tilefni dagsins. Til eru hvorki fleiri né færri en 450 tegundir af norska þjóðbúningnum og um 70% norskra kvenna eiga slíka viðhafnarflík. Um 20% karla eiga þá norskan þjóðbúning.

Börn fylkja liði í skrúðgöngu niður Karl Johans-götu í miðborg Óslóar í dag. Hátíðarhöld hafa staðið síðan snemma í morgun í tilefni af þjóðhátíðardeginum. AFP/Amanda Pedersen Giske

Dagurinn tekinn snemma

Norðmenn taka daginn jafnan snemma og til marks um það samþykkti borgarstjórnin í höfuðborginni Ósló að leyfa veitingu freyðivíns, annars léttvíns og bjórs frá klukkan 8 í morgun í miðborginni en jafnan þurfa Norðmenn að bíða lengur eftir slíkum veigum á veitingahúsum miðborgarinnar.

Skrúðgöngur hefjast jafnan klukkan 10.

Börnin voru öll púðbúin og langflest í norska þjóðbúningnum. AFP/Lise Åserud

Pylsur og ís í massavís

Frændur okkar þurfa að næra sig á löngum degi sem þessum en talið er að Norðmenn sporðrenni 13 milljón pylsum á þjóðhátíðardegi sínum og borði tíu sinnum meiri rjómaís en alla jafna á sólríkum sumardegi.

Á þessum degi lýkur svokallaðri „russetid“, sem er þriggja vikna skemmtanatörn hressra norskra framhaldsskólanema.