Páfinn ræddi við Selenskí

Embættistíð Leós XIV páfa hófst með formlegum hætti nú í morgun með hátíðlegri innsetningarmessu á Pét­urs­torg­inu í Vatíkaninu.

Vel var tekið á móti páfa er hann kom til athafnarinnar á hinum svokallaða páfabíl, en um 100.000 manns voru saman komin á Péturstorginu til að fagna innsetningu hans. Mikill fögnuður braust jafnframt út þegar páfinn gerði hlé á för sinni til Péturskirkjunnar til að blessa barn úr hópi áhorfendanna.

Hrópuðu margir í mannfjöldanum orðin „Viva il Papa“, þ.e. lengi lifi páfinn þegar hann steig svo í pontu.

Hitti Selenskí eftir messu

Fór hinn nýi páfi yfir víðan völl í innsetningarpredikun sinni. Ítrekaði hann áhyggjur sínar af stríðinu í Úkraínu í bæn sinni og sagði „píslarvottinn Úkraínu nú bíða eftir réttlátum og varanlegur friði“. 

Volodimír Selenskí Úkraínuforseti var viðstaddur athöfnina og fór vel á með honum og páfanum. Ræddu þeir stuttlega saman að messu lokinni.

Hið táknræna pallíumi afhent páfa. AFP

Líkur forvera sínum

Þá fordæmdi páfinn arðrán á fátækum um heim allan. Sagði hann jafnframt ekkert rúm vera fyrir óeiningu innan kirkjunnar og vísaði þar til átaka íhaldsamra og frjálslyndra afla innan kirkjunnar í gegnum tíðina.

Predikun Leós endurómaði því að miklu leyti sömu áherslur og Francis, forveri hans predikaði í tíð sinni.

Kardínálar á leið til messu AFP

Táknrænn gjörningur

Eins og kaþólsku kirkjunni sæmir var guðsþjónustan hin glæsilegasta, en fór hún jafnframt fram samkvæmt aldagömlum reglum um innsetningu páfa. 

Í athöfninni fór meðal annars fram formlega afhending á heilögum táknum embættisins til Leós. Fékk hann t.d. svokallað pallíum, sem er lambsullarskrúði sem tákna á sálgæslu og hlutverk hans sem hirðir kirkjunnar.

Leó páfi veifar til viðstaddra á Péturstorginu. AFP

Þá fékk hann einnig sjómannahringinn, sem táknar vald páfans sem arftaka heilags Péturs sem gjarnan er talinn fyrsti páfinn en hann var sjómaður að atvinnu. 

AFP

• Blogga um frétt