Þrír látnir eftir þrumuveður í Frakklandi

Að minnsta kosti þrír eru látnir eftir að þrumuveður skall á í Suðaustur-Frakklandi í dag.

Hjón létu lífið eftir að bíll þeirra varð fyrir flóði í sjávarbænum Le Lavandou og var lík konunnar fast í rústum bílsins. Rannsókn er hafin á dánarorsökum hjónanna en viðbragsðaðilar lýsa erfiðum aðstæðum á vettvangi.

Einn lést í bænum Vidauban eftir að bílstjóri með einn farþega í bílnum ók inn á sveitarveg sem flætt hafði yfir og lenti ofan í skurði. Viðbragðsaðilar náðu bílstjóranum úr bílnum en ekki náðist að bjarga farþeganum.

„Það er ekkert eftir“

Gil Bernardi, bæjarstjóri Le Lavandou, lýsir aðstæðum eins og stríðsástandi. Hann segir vegi eyðilagða og að brýr hafi klofnað í sundur.

„Þetta var svakalega ofsafengið, illt og óskiljanlegt fyrirbæri.

Það er ekkert eftir, ekkert rafmagn, ekkert drykkjarvatn, engin fráveituverksmiðja,“ segir hann.