Erlent | AFP | 13.6.2025 | 15:35

Árásirnar hafa afhjúpað alvarlega veikleika

Íbúi í Teheran, höfuðborg Írans, sést hér taka mynd af fjölbýlishúsi sem skemmdist í árásum Ísraela í dag. AFP

Árásir Ísraelshers á Íran í dag hafa afhjúpað alvarlega veikleika íranskra stjórnvalda sem hafa hamlað getu þeirra til að bregðast við hernaðarlega. Þetta segja hernaðarsérfræðingar.

Talsmenn Ísraelshers segjast hafa gert árásir á 100 skotmörk, þar á meðal íranskar kjarnorku- og herstöðvar. Þá hafi þeir fellt háttsetta einstaklinga, meðal annars yfirmann herafla og fremstu vísindamenn á sviði kjarnorkumála í landinu.

Ali Khamenei, æðstiklerkur Írans, heitir hefndum. AFP

Æðstiklerkurinn heitir því að brugðist verði við árásunum

Ali Khamenei, æðstiklerkur Írans, hefur varað Ísrael við því að „beisk og sársaukafull“ örlög bíði þeirra vegna árásanna. Hernaðarsérfræðingar telja aftur á móti að Íran standi aðeins frammi fyrir fáum valkostum hvað varðar viðbrögð.

Ali Fathollah-Nejad, framkvæmdastjóri hugveitunnar Center for Middle East and Global Order (CMEG) í Berlín í Þýsklandi, segir að þetta sé meiri háttar högg og áfall fyrir Íran.

„Þetta afhjúpar alvarlegan veikleika stjórnkerfisins hvað varðar hernaðar- og öryggismál og lykilinnviði landsins – þar á meðal kjarnorkumál – sem og æðstu stjórnmála- og herleiðtoga þess,“ sagði Nejad við AFP.

Hann bætti við að markmið aðgerðanna væri að lama hernaðar- og gagnárásargetu Írans.

Hér má sjá byggingunni í borginni sem stórskemmdist á árásunum. AFP

Deilt um kjarnorkuáætlun Írans

Bandaríkin og önnur vestræn ríki, ásamt Ísrael, hafa sakað Íran um að ætla sér að smíða kjarnorkuvopn.

Írönsk stjórnvöld vísa því hins vegar alfarið á bug. Ríkið hefur aftur á móti smátt og smátt verið að víkja frá skuldbindingum sínum samkvæmt kjarnorkusamkomulaginu sem það gerði árið 2015, eftir að Bandaríkin drógu sig út úr því.

Samningurinn gekk út á það að Íran myndi ekki hljóta refsiaðgerðir eða efnahagsþvinganir svo lengi sem ríkið myndi draga úr kjarnorkuáætlun sinni.