Svarti kassi flugvélarinnar fundinn

Svarti kassi flugvélarinnar sem hrapaði í íbúabyggð í Ahmedabad á Indlandi er fundinn. Flugmálaráðherra Indlands segir það hjálpa rannsókn flugslyssins gríðarlega að fá svarta kassann í hendurnar.

Flugvélin sendi frá sér neyðarkall eftir að hafa náð um 100 metra hæð. Skömmu síðar hrapaði vélin á íbúðarhúsnæði þar sem læknar bjuggu ásamt fjölskyldum sínum.

Alls hafa 265 fundist látin eftir flugslysið, bæði farþegar úr vélinni og fólk á jörðu. Tala látinna gæti hækkað eftir að niðurstöður úr DNA-sýnum berast.

Vishwash Kumar Rmaesh, breskur ríkisborgari, var eini farþegi vélarinnar sem lifði slysið af. 

Tala látinna gæti hækkað

Flugvélin var frá flugfélaginu Air- India og af gerðinni Boeing 787-8 Dreamliner. Þetta er fyrsta flugslysið í heiminum sem verður á þessari gerð Boeing vélar.

242 manns voru um borð í vélinni sem var á leið til Lundúna. 

Líklegt að báðar vélar flugvélarinnar hafi bilað

Sérfræðingar segja of snemmt að segja til um það hvers vegna vélin hrapaði. Þeir segja vélina hannaða til þess að geta flogið með einn hreyfil. Það er því líklegt að báðir hreyflarnir hafi bilað, að sögn Jason Knight, sérfræðings við Portsmouth háskóla.

Helsta orsök þess að báðir hreyflar í flugvél bila er að fuglar fljúgi inn í þá. Fuglar flugu inn í hreyfla US Airways flugvél árið 2009 sem varð til þess að flugvélin missti afl og þurfti að nauðlenda á Hudson fljóti í New York.

Frétt af mbl.is

Staðfest að fuglar ollu flugslysi

• Blogga um frétt