Umdeildur en áhrifamikill aðgerðasinni
Setja bókamerki
Charlie Kirk, sem ráðinn var af dögum í gær, var pólitískur aðgerðasinni og einn þekktasti íhaldsmaður Bandaríkjanna. Hann var stofnandi samtakanna Turning Point USA sem er ein stærsta hreyfing sinnar tegundar í Bandaríkjunum.
Kirk var náinn bandamaður Donalds Trumps Bandaríkjaforseta og gaf meðal annars út bókina The Maga Doctrine, sem fjallar um herferð Trumps, Make America Great Again. Kirk var umdeildur en áhrifamikill á hægri væng bandarískra stjórnmála og kom víða fram á viðburðum þar sem hann rökræddi við pólitíska andstæðinga sína.
Kirk var skotinn til bana á fjölmennum viðburði í Utah Valley-háskólanum í gær. Hann var að svara spurningum háskólanema þegar hann var skotinn til bana. Hann lést af sárum sínum.
Kirk var giftur Eriku Frantzve Kirk og áttu þau saman tvö börn, fædd 2022 og 2024.
Þekktur fyrir rökræðuhæfni
Kirk hét fullu nafni Charles James Kirk. Hann fæddist 14. október 1993 í Arlington Heights í Illinois-ríki og ólst þar upp.
Kirk fór í Harper-háskóla en hætti fljótlega í náminu til að einbeita sér að því að dreifa hægri hugmyndafræði í Bandaríkjunum.
Árið 2012, þá 18 ára gamall, stofnaði hann samtökin Turning Point USA sem hefur það að markmiði að breiða út hægri hugmyndafræði í bandarískum háskólum.
Samtökin eru enn starfandi og starfa nú í um 850 háskólum víðs vegar um Bandaríkin. Kirk var á viðburði samtakanna í Utah þegar hann var drepinn.
Kirk hélt einnig úti hlaðvarpinu The Charlie Kirk Show sem hálf milljón manna hlustuðu á mánaðarlega auk þess sem hann var virkur á samfélagsmiðlum. Þar ræddi hann ýmis pólitísk málefni en Kirk var þekktur fyrir umdeildar skoðanir sínar og færni í rökræðum.
Til að mynda var hann með efasemdir um ágæti bólusetninga og sóttvarnaaðgerða á tímum kórónuveirufaraldursins, var talsmaður þess að Bandaríkjamenn ættu að fá að bera vopn auk þess sem hann lýsti andstöðu sinni við ólöglega innflytjendur, samkynja hjónabönd og trans fólk.
Píslarvottur sannleikans
Eins og fyrr segir var Kirk dyggur stuðningsmaður Trumps og var hann afar áberandi í kosningabaráttu Trumps fyrir síðustu forsetakosningar. Samtökin hans, Turning Point USA, léku þar stórt hlutverk.
Trump var sá sem greindi frá andláti Kirks.
Trump minntist Kirks sem goðsagnar sem hafi verið dýrkaður og dáður af öllum. Hann sagði Kirk hafa verið píslarvott sannleikans og kenndi hann orðræðu róttækra vinstrimanna um morðið.
„Hinn frábæri og goðsagnakenndi Charlie Kirk er látinn. Enginn skildi unga fólkið í Bandaríkjunum betur en Charlie. Hann var dýrkaður og dáður af ÖLLUM og þá sérstaklega mér og nú er hann ekki lengur með okkur. Við Melania sendum okkar dýpstu samúðarkveðjur til fallegu konu hans Eriku og fjölskyldu hans. Charlie, við elskum þig,“ skrifaði Trump á Truth Social.
Tjónið hleypur á hundruðum milljóna króna
Niðrandi ummæli um húðlit ekki í anda hins látna
Toppurinn nánast stráheill
Komi í ljós á næstunni hvort viðmiðið dugi
Treystir Karli Inga þrátt fyrir handtöku
Íkveikja: Ekki skýrt að kveikjarar væru bannaðir