Erlent | AFP | 2.10.2025 | 7:54 | Uppfært 9:35

Vill kröftug viðbrögð vegna afhjúpunar BBC

Lögreglumenn að störfum á meðan á mótmælum stóð í London. AFP/Toby Shepeard

Keir Starmer, forsætisráðherra Bretlands, hefur óskað eftir kröftugum viðbrögðum frá yfirmanni lögreglunnar í London eftir að umfjöllun BBC leiddi í ljós kynþáttahatur og kvenfyrirlitningu á meðal lögreglumanna.

„Ég hef ekki séð myndefnið en ég því hefur verði lýst fyrir mig og ég er í miklu sjokki yfir því og ánægður með viðbrögð lögreglustjórans. Hann verður að bregðast við af miklum krafti,” sagði Starmer í morgun áður en hann fundaði með leiðtogum ESB í Kaupmannahöfn.

Keir Starmer í Kaupmannahöfn. AFP/Emil Helms

Leynilegar upptökur voru birtar í þætti BBC, Panorama, þar sem lögreglumenn í London sögðust vilja láta skjóta innflytjendur, lýstu yfir ánægju sinni með beitingu valds og gerðu lítið úr tilkynntum nauðgunum.

Í upptökunum sjást lögreglumennirnir hafa uppi kynferðisleg ummæli um samstarfsfólk sitt og tala illa um innflytjendur og múslima.

Mark Rowley. AFP/Yui Mok

Eftir að BBC sendi lögreglunni nákvæman lista yfir ásakanirnar á hendur lögreglunni var átta lögreglumönnum vikið úr starfi og einum starfsmanni innan lögreglunnar. Tveimur lögreglumönnum til viðbótar var ekki lengur leyft að starfa úti á götu.

Lögreglustjórinn Sir Mark Rowley sagði að hegðun lögreglumannanna væri „skammarleg, algjörlega óásættanleg og þvert á gildi og gæðaviðmið lögreglunnar”.