Erlent | AFP | 4.10.2025 | 7:50

Árásir héldu áfram þrátt fyrir skipun Trumps

Árás var gerð á flóttamannabúðir í Khan Yunis í nótt. Myndin er frá árás sem var gerð 29. september. AFP

Almannavarnir á Gasa greindu frá því að Ísraelsmenn hefðu haldið áfram loftárásum á Gasaborg þrátt fyrir skipun Donalds Trumps Bandaríkjaforseta um að árásum hersins yrði tafarlaust hætt.

Frétt af mbl.is

Trump segir Ísraelum að láta af loftárásum

„Þetta var mjög ofbeldisfull nótt þar sem (ísraelski herinn) gerði tugi loftárása og stórskotaliðsárása á Gasaborg og önnur svæði á Gasa þrátt fyrir skipun Trumps um að stöðva árásirnar,“ sagði Mahmud Bassal, talsmaður almannavarna á Gasa, við AFP-fréttaveituna.

Bassal sagði að 20 heimili hefðu eyðilagst í árásunum í nótt.

Að minnsta kosti 6 drepnir

Sjúkrahús í Gasaborg greindi frá því að fjórir hefðu verið drepnir og nokkrir særst á heimili í Tuffah-hverfi.

Nasser-sjúkrahúsið í Khan Yunis greindi frá því að tvö börn hefðu verið drepin og átta særst í drónaárás á flóttamannabúðir.

Áætlun Trumps um frið kveður á um vopnahlé, lausn gísla innan 72 klukkustunda, afvopnun Hamas og stigvaxandi brottflutning Ísraela frá Gasasvæðinu.

Í gær greindu Hamas frá því að samtökin væru reiðubúin að frelsa alla gísla sem eru í haldi á Gasa en kölluðu eftir frekari upplýsingum um framtíð Gasasvæðsins.