Erlent | mbl | 4.10.2025 | 16:32 | Uppfært 5.10.2025 7:01

Rússar herða árásir á lestarkerfi Úkraínu

Rússar hafa reglulega beint spjótum sínum að lestarkerfum og orkuinnviðum Úkraínu frá því að innrás hófst árið 2022. AFP/Kuleba

Framkvæmdastjóri úkraínska lestarkerfisins segir Rússa hafa hert árásir sínar á innviði kerfisins í þeim tilgangi að einangra byggðir við víglínuna fyrir komandi vetrarmánuði.

Samkvæmt úkraínskum stjórnvöldum var einn maður drepinn og tugir særðust þegar rússneskir drónar gerðu árás á tvær farþegalestir í Sumy-héraði fyrir skemmstu.

Volodimír Selenskí, forseti Úkraínu, hefur fordæmt árásina.

Frétt af mbl.is

30 særðust í árás á lestarstöð

Árásir orðnar markvissari

Oleksandr Pertsovsky framkvæmdastjóri segir að rússneskar árásir á lestarkerfi Úkraínu séu orðnar markvissari og að erfiðara sé að verja sig gegn þeim.

Hann hefur varað við því að með nákvæmari vopnum, á borð við íranska Shahed-dróna, gætu árásirnar haft enn verri afleiðingar.

Rússar hafa reglulega beint spjótum sínum að lestarkerfum og orkuinnviðum Úkraínu frá því að innrás hófst árið 2022.