Erlent | AFP | 5.10.2025 | 8:38 | Uppfært 14:03

Mikilvægar viðræður hefjast í dag

Sendinefndir Ísraelsmanna og Hamas halda til í Kaíró í Egyptalandi í dag til að funda um vopnahlé. Benjamín Netanjahú, forsætisráðherra Ísraels, sagðist vona að frelsun gísla á Gasa færi fram á næstu dögum.

Viðræðurnar eru haldnar í kjölfar jákvæðra viðbragða Hamas á föstudag við friðaráætlun Donalds Trumps Bandaríkjaforseta sem hann lagði fram á mánudag um frelsun gíslanna gegn því að sleppa fjölmörgum palestínskum föngum.

Frétt af mbl.is

Segir friðarsamkomulag í augsýn

Netanjahú sagði í gær að hann hefði fyrirskipað að senda samninganefnd til Egyptalands til þess að „ganga frá tæknilegum atriðum“.

Yfirvöld í Kaíró staðfestu að einnig yrði tekið á móti sendinefnd Hamas til viðræðna um „aðstæður á vettvangi og smáatriði varðandi skipti á öllum ísraelskum gíslum og palestínskum föngum“.

Fjölmiðlar í Egyptalandi greindu frá því að fundað verði í gegnum milliliði í dag og á morgun.

Á þriðjudag, 7. október, eru tvö ár frá hryðjuverkaárás Hamas sem leiddi til stríðsins.

Munu afvopna Hamas

Hvíta húsið sendi tvo fulltrúa til Egyptalands í gær, Jared Kushner, tengdason Trumps, og Steve Witkoff erindreka.

Trump hefur sagt að hann muni ekki „liða neinar tafir“ frá Hamas.

„Þegar Hamas samþykkir mun vopnahlé strax taka gildi,“ sagði í færslu Trumps á Truth Social.

Jared Kushner og Steve Witkoff eru fulltrúar Bandaríkjanna í viðræðunum. AFP

Í sjónvarpsávarpi sagði Netanjahú gíslarnir kæmu heim á meðan laufskálahátíðin stendur yfir (sukkot). Um er að ræða vikulanga þakkarhátíð gyðinga sem hefst á mánudag.

„Hamas verður afvopnað... annaðhvort með diplómatískum leiðum samkvæmt áætlun Trumps eða með hervaldi af okkar hálfu.“