Erlent | AFP | 5.10.2025 | 7:36

Sendir þjóðvarðlið til Chicago

Frá mótmælum í Chicago. AFP

Donald Trump Bandaríkjaforseti hefur heimilað að senda þjóðvarðlið til Chicago í Illinois í kjölfar þess að alríkislögreglumaður skaut ökumann sem sagður var vopnaður í gær. Á sama tíma reyndi dómari að koma í veg fyrir að þjóðvarðlið yrði sent til Portland í Oregon, annarrar borgar sem stýrt er af demókrötum.

„Trump forseti hefur heimilað að senda 300 þjóðvarðliða til þess að vernda alríkislögreglumenn og -innviði“ í Chicago sagði í yfirlýsingu Abigail Jackson, talskonu Hvíta hússins.

Repúblikanar hafa hótað í margar vikur að senda þjóðvarðlið til borgarinnar gegn vilja borgaryfirvalda.

„Trump forseti mun ekki horfa fram hjá þeirri lögleysu sem herjar á bandarískar borgir,“ sagði í yfirlýsingu Jackson.

Frétt af mbl.is

Boðar aðgerðir í „hættulegustu borg heims“

Dreifir ótta

Dick Durbin, öldungadeildarþingmaður í Illinois, sagði aðgerðirnar „skammarlegan kafla í sögu þjóðarinnar“, og bætti við að Trump hefði ekki í hyggju að berjast gegn glæpum. „Hann ætlar sér að dreifa ótta.“

Þjóðvarðlið hefur þegar verið sent til Los Angeles og Washington-borgar fyrr á árinu. Aðgerðirnar eru hluti af stefnu forsetans um að bregðast við ofbeldisglæpum og herða aðgerðir gegn innflytjendum í bandarískum stórborgum.

Frétt af mbl.is

Washington í mál gegn alríkisstjórninni

Grímuklæddir vopnaðir menn í ómerktum bílum sem beindu spjótum sínum að íbúðahverfum og fyrirtækjum leiddu til harðra mótmæla í báðum borgum.

Trump hefur sagt Portland „stríðshrjáða“ og morandi í ofbeldisglæpum.

Í dómsúrskurði Karin Immergut héraðsdómara, sem gefinn var út í gær, sagði að „ákvörðun forsetans væri einfaldlega úr lausu lofti gripin“.

Frá mótmælum í Portland í gærkvöldi fyrir utan miðstöð ICE. AFP

Lögregla króuð af

Snemma í gærmorgun skaut alríkislögreglumaður ökumann í Chicago eftir að lögrelgumenn voru „króaðir af 10 bílum“, að sögn heimavarnarráðuneytisins (DHS).

Lögreglan gat ekki hreyft bíla sína eða stigið út úr þeim. „Einn ökumannanna keyrði á lögreglubíl og var vopnaður hálfsjálfvirku vopni,“ sagði í yfirlýsingu DHS.

„Lögreglan neyddist til þess að beita vopnum sínu og skjóta varnarskotum að vopnuðum bandarískum ríkisborgara.“

Samkvæmt yfirlýsingunni leitaði ökumaðurinn sjálfur á sjúkrahús þar sem hugað var að sárum hans.