Í ógöngum á Everest: „Heppinn að sleppa í burtu“

Sumir fjallgöngumenn sem lentu í óvæntu hríðarveðri skammt frá Everest-fjalli lentu í ofkælingu er þeir börðust við mikla snjókomu.

Á sama tíma heldur björgunarfólk áfram að reyna að koma fjölda fólks brott.

Frétt af mbl.is

Yfir 200 manns fastir í hlíðum Everest

Að minnsta kosti einn fjallgöngumaður er látinn og meira en 200 er enn fastur í austurhlíðum Everest í Tíbet. Svæðið er vinsælt á meðal fjallgöngumanna.

Um 350 manns hefur verið bjargað úr óveðrinu og dvelur fólkið í bænum Qudang. Yfirvöld eru í samskiptum við fjallgöngumennina sem eru enn fastir á svæðinu.

Aldrei upplifað annað eins

Dong Shuchang náttúruljósmyndari var á meðal hundraða ferðamanna sem voru á svæðinu.

„Eldingarnar og þrumuveðrið héldu stanslaust áfram. Snjókoman var svo mikil að ég gat varla sofið,” sagði Dong. Hópurinn hans var kominn í 4.600 metra hæð þegar hann ákvað að snúa við. 

Dong bætti við að allir hefðu verið gegnblautir og að þó nokkrir í hópnum hefðu sýnt merki um ofkælingu.

Grunnbúðir Everest. AFP/Purnima Shrestha

Dong, sem er 27 ára, sagðist oft hafa farið í Himalaya-fjöllin en aldrei upplifað annað eins veður. „Allir hreyfðust mjög hægt. Leiðin var mjög hál og ég datt hvað eftir annað vegna klakans.”

Hópurinn komst á endanum til Qudang, að því er BBC greindi frá. 

„Ótrúlega erfitt“

Chen Geshuang, sem var hluti af leiðangri Dong, sagði snjóinn hafa verið eins metra djúpan þegar hópurinn sneri við í gær.

„Við erum allir reynslumiklir fjallgöngumenn,” sagði Chen. „En það var samt ótrúlega erfitt að eiga við þetta hríðarveður. Ég var virkilega heppinn að sleppa í burtu.”

• Blogga um frétt