Henni var meinað að bjóða sig fram gegn Maduro í forsetakosningunum árið 2024 og var í framhaldinu fangelsuð en sleppt lausri eftir að hafa reynt að hvetja til aukinna mótmæla gegn venesúelska leiðtoganum.

Nicolas Maduro, forseti Venesúela. AFP/Federico Parra

Í júlí hvatti hún til „leynilegrar” andstöðu gegn Maduro þegar ár var liðið síðan hann hlaut umdeilt endurkjör.

Í margar vikur hefur orðrómur verið uppi á samfélagsmiðlum um að Machado, sem er nú í felum, haldi til í bandaríska sendiráðinu í Venesúela.

Frétt af mbl.is

Kom úr felum og var handtekin

Samkvæmt skoðanakönnunum er Machado langvinsælasti stjórnmálamaðurinn í Venesúela.

Tók skref til baka 

Skömmu fyrir kosningarnar þurfti hún að sætta sig við að taka pólitískt skref til baka og berjast fyrir kjöri hins lítt þekkta erindreka Edmundo Gonzalez Urrutia eftir að nafn hans var á síðustu stundu sett á kjörseðlana í stað hennar. Machado hafði unnið forskosningar stjórnarandstöðunnar með 90% atkvæða árið 2023 en yfirvöld, hliðholl Maduro, voru fljót að ógilda kjörið hennar. 

Edmundo Gonzalez Urrutia ásamt Machado á kosningafundi í fyrrasumar. AFP/Raul Arboleda

Í staðinn barðist hún fyrir kjöri Urrutia, fór með honum á kosningafundi og baðaði sig í sviðsljósinu, sem hann forðaðist aftur á móti.

Á kosningafundum hefur Machado ávallt klæðst hvítum fötum með talnabönd um hálsinn sem hún hefur fengið að gjöf frá áköfum stuðningsmönnum sínum.

Þeir hafa flykkst að henni til að fá að snerta hana, fá hana til að halda á börnum þeirra, látið hana hafa handskrifaðar stuðningsyfirlýsingar eða gefið henni hafnarboltahúfur eða blóm, eins og um rokkstjörnu sé að ræða.

„Si, se puede!” (Já, við getum!), hrópa þeir á kosningafundum hennar.

Machado nýtur mikilla vinsælda í heimalandi sínu. AFP/Juan Barreto

Þrátt fyrir alla spennuna í kringum Machado skipti það litlu máli þegar kjördagurinn rann upp í fyrra og Maduro lýsti sig sigurvegara.

Frétt af mbl.is

Maduro lýstur réttmætur forseti

Frétt af mbl.is

Maduro ekki réttur sigurvegari að sögn Blinken

Evrópusambandið og fjölmörg önnur lönd hafa viðurkennt Gonzalez Urrutia sem réttkjörinn forseta Venesúela.

Bandaríkjamenn andsnúnir Maduro

Tilkynningin um Nóbelsverðlaunin kemur á sama tíma og Bandaríkin hafa haldið úti auknum árásum á alþjóðlegum hafsvæðum þar sem þau segjast berjast gegn eiturlyfjasmyglurum.

Frétt af mbl.is

Myndskeið: Sökktu fíkniefnabáti með 11 um borð

Bandaríski herinn hefur drepið að minnsta kosti 21 manneskju á undanförnum vikum.

Bandarísk stjórnvöld saka Maduro um að stjórna eiturlyfjahring og viðurkenna hann ekki sem réttmætan leiðtoga Venesúela.

Machado og Gonzalez Urrutia í fyrrasumar. AFP/Yuri Cortez

Í sameiginlegu myndskeiði sem var birt í síðasta mánuði sögðust Machado og Gonzalez Urrutia styðja aukinn þrýsting Bandaríkjahers á ríkisstjórn Maduros og sögðu hann nauðsynlegan til að endurheimta fullveldi Venesúela.

Þau sökuðu ríkisstjórn Maduros um að smygla „eiturlyfjum, steintegundum, málmi, vopnum og manneskjum og einnig um marga aðra glæpi.”

Birtist óvænt og heldur ræður

Ólíkt Gonzalez Urrutia, sem hefur verið í útlegð á Spáni eftir að hafa fengið hótanir í kjölfar forsetakosninganna, ákvað Machado að vera áfram í Venesúela til að leiða stjórnarandstöðuna á sama tíma og hún er í felum.

Loftmynd af mótmælafundi sem Machado efndi til í fyrra þar sem þúsundir létu sjá sig. AFP/Juan Barreto

Hún á það til að birtast óvænt, til dæmis á palli vörubíls á götuhorni þar sem hún hefur haldið ræðu áður en hún hefur þurft að flýja í burtu á mótorhjóli til að forðast handtöku.

Börnin úr landi eftir líflátshótanir

Machado, sem stundaði nám í verkfræði, fæddist í höfuðborginni Caracas. Hún hóf stjórnmálaferil sinn árið 2002 sem formaður samtakanna Sumate (Gangið til liðs við okkur) sem börðust fyrir þjóðaratkvæðagreiðslu til að fjarlægja læriföður Maduros, Hugo Chavez, frá völdum.

Machado var sökuð um landráð vegna þessarar baráttu og fékk morðhótanir, sem varð til þess að hún ákvað að senda tvo unga syni sína og dóttur úr landi.

Henni var bannað að bjóða sig fram til embættis forseta árið 2023. Einnig var henni meinað að fljúga og ferðast vítt og breitt um landið til að taka þátt í kosningabaráttu Gonzalez Urrutia.

Maria Corina Machado heldur á fána Venesúela á mótmælafundi. AFP/Juan Barreto

Sjö milljónir flúið land

Machado hafði lofað því að binda enda á sífellt grimmara stjórnarfar í Venesúlea. Síðustu ár þar í landi hafa einkennst af alvarlegum efnahagsvanda sem hefur orðið til þess að sjö milljónir manna, næstum fjórðungur þjóðarinnar, hefur flutt úr landi.

„Við ætlum að frelsa landið og ná börnunum okkar aftur heim,” sagði hún.

Í október í fyrra hlutu Machado og Gonzalez Urrutia mannréttindaverðlaun Evrópuráðsins fyrir að hafa „haldið á lofti á óttalausan hátt” gildum réttlætis, lýðræðis og laga og reglna.

Frétt af mbl.is

Evrópuráðið heiðraði Machado