Fólk og byggingar hurfu á örfáum mínútum

Flóð af völdum úrhellisrigninga hafa orðið að minnsta kosti 37 manns að bana í Mexíkó síðustu daga og skilið eftir sig slóð eyðileggingar.

Rosalia Ortega stóð við lík systur sinnar og var þakklát fyrir að hafa fundið hana í leðjufljótinu sem skyndilega hreif með sér húsið hennar þegar gríðarleg úrkoma dundi yfir mexíkóska fjallaþorpið hennar.

Að minnsta kosti 47 manns hafa látist síðan á fimmtudag þegar flóð ollu mikilli eyðileggingu í ríkjunum Hidalgo, Puebla, Queretaro og Veracruz, sem urðu verst úti.

„Við erum sorgmædd en við munum að minnsta kosti veita henni kristilega útför,“ sagði Ortega, 76 ára, við AFP í bænum Huauchinango í Puebla, ríki austur af Mexíkóborg þar sem níu létust og urðu fyrir verulegu tjóni.

Hamfarasvæðið er Sierra Madre Oriental, fjallgarður sem liggur samsíða austurströnd Mexíkó og er þéttsetinn þorpum þar sem enn á eftir að koma á fjarskiptum og annarri þjónustu.

Flæddi yfir bakka sína eftir myrkur

Á fimmtudag, löngu eftir myrkur, flæddi vatnsmikið fjallafljót yfir bakka sína í Huauchinango og rændi íbúa heimilum sínum og í sumum tilfellum ástvinum sínum á örfáum mínútum.

Það var það sem kom fyrir Mariu Salas sem leitaði skjóls undan rigningunni með regnhlíf og horfði á tvo hermenn gæta inngangsins að hverfinu hennar.

Allt farið

Salas missti fimm ættingja þegar hús þeirra hrundi og heimili hennar eyðilagðist í aurskriðu.

„Ég næ ekki í eigur mínar, ég get ekki sofið þar,“ sagði hún. „Ég á ekki neitt.“

Syrgjandi fjölskyldur eiga í erfiðleikum með að greiða fyrir útfarir og, ef eitthvað er afgangs, að endurheimta eitthvað úr týndum eða skemmdum heimilum.

Huauchinango, með 100.000 íbúa, er eitt stærsta samfélagið á hamfarasvæðinu og eitt af fáum sem hægt var að komast til á laugardag.

Flóðin hrifu allt með sér sem á vegi þeirra varð og mynduðu þung leðjufljót sem gerðu jafnvel óskemmd hús óíbúðarhæf.

• Blogga um frétt