Gæti haft áhrif á stöðu svartra í Bandaríkjunum

Stjórnmálaskýrendur í Bandaríkjunum telja líklegt að Hæstiréttur landsins hætti að líta til kynþáttar þegar kjördæmi eru dregin upp.

Slík niðurstaða gæti haft áhrif á valdajafnvægi í fulltrúadeild Bandaríkjaþings og styrkt stöðu Repúblikanaflokksins.

Hægri sinnaður dómur

Hæstiréttur tók í vikunni fyrir dómsmál þar sem tekist er á um réttmæti kjördæmaskipana eftir kynþætti.

Við munnlegan málflutning virtust hægrisinnaðir dómarar, sem mynda meirihluta í níu manna dóminum, hafa lítinn vilja til að halda í fyrri túlkun á lögum um kosningarétt.

Spurningar dómara þykja bera með sér efasemdir um að kynþáttur eigi að hafa áhrif við skipan kjördæma.

Þykir styrkja repúblikana

Málið snýst um kjördæmaskipan í Louisiana-ríki þar sem þriðjungur íbúa er svartur.

Í nýjum uppdrætti af kjördæmaskipan er aðeins gert ráð fyrir einu kjördæmi þar sem svartir eru í meirihluta, í stað tveggja áður, og þykir það styrkja stöðu repúblikana í ríkinu á kostnað demókrata.

Samtök sem berjast fyrir réttindum svartra telja að ef fordæmi skapist gæti það haft áhrif á stöðu svartra kjósenda um öll Bandaríkin.

Repúblikanar í Louisiana segja hins vegar að kjördæmaskipan sem byggir á kynþætti brjóti gegn stjórnarskrá Bandaríkjanna.

Gert er ráð fyrir að Hæstiréttur kveði upp dóm í málinu í júní.

• Blogga um frétt