Starmer sakaður um að hlífa Kína í njósnamáli

Keir Starmer, leiðtogi Verkamannaflokksins og forsætisráðherra Bretlands, liggur undir ásökunum frá Íhaldsflokknum um að hafa beitt sér fyrir því að tveir breskir ríkisborgarar, sem sakaðir voru um njósnir, yrðu ekki ákærðir — í þeim tilgangi að styggja ekki kínversk stjórnvöld.

Starmer gegndi embætti saksóknara þegar málið kom fyrst upp, en meintar njósnir mannanna náðu til áranna 2021 til 2023. Málið var fellt niður í síðasta mánuði.

Hann hafnar ásökunum um að ríkisstjórnin hafi komið í veg fyrir að málið færi fyrir dóm til að vernda samskipti við Kína.

Ekki talin ógn við þjóðaröryggi

Niðurstaða saksóknaraembættisins Crown Prosecution Service var sú að sönnunargögnin hefðu ekki sýnt fram á að Kína teldist ógn við þjóðaröryggi á þeim tíma sem meint brot áttu sér stað, á árunum 2021 til 2023.

Þjóðaröryggisráð Bretlands hefur hins vegar nýlega, eða árið 2025, lýst því yfir að kínverskar njósnaaðgerðir ógni breskum hagsmunum.

Krefjast birtingar Kína-skjala

Starmer, sem áður gegndi embætti æðsta ríkissaksóknara Bretlands, sagði að saksóknarar hefðu aðeins getað lagt fram gögn frá árunum 2021 til 2023, þegar Íhaldsflokkurinn var við völd. Hann sagði málið hafa fallið á þessu tæknilega atriði og að hann væri vonsvikinn yfir því að mennirnir hefðu ekki verið ákærðir.

Íhaldsflokkurinn krefst þess að svonefnd „Kína-skjöl“ verði birt í heild sinni og sakar forsætisráðherrann um leyndarhyggju.

Vill efla kínverska fjárfestingu

Starmer hefur að undanförnu leitast við að bæta samskipti Bretlands við Kína og varð í fyrra fyrsti breski leiðtoginn í sex ár til að hitta Xi Jinping, forseta Kína. Ríkisstjórn hans vonast til að laða að kínverskar fjárfestingar til að styrkja brothætt efnahagslíf Bretlands.

Samhliða því stendur yfir umræða um hvort heimila eigi byggingu nýs kínversks sendiráðs í Lundúnum, en áformin hafa verið umdeild meðal íbúa og mannréttindasamtaka.

• Blogga um frétt