Talinn hafa ráðið föður sinn af dögum

Spænska lögreglan rannsakar nú andlát Isaks Andic, stofnanda tískurisans Mango, sem mögulegt manndráp og beinist rannsóknin að syni hans.

Andic, sem var 71 árs, lést í desember í fyrra þegar hann féll til bana í fjallgöngu rétt utan við Barselóna á Spáni.

Dauði hans vakti mikla athygli þar sem hann hafði byggt upp eitt stærsta tískufyrirtæki Evrópu sem rekur um 2.800 verslanir víða um heim.

Frétt af mbl.is

Stofnandi Mango lést í slysi

Rannsaka atvikið nú sem manndráp

Samkvæmt dagblaðinu El País hefur lögreglan í Katalóníu nú breytt rannsókninni og metur hún andlátið nú sem mögulegt manndráp en ekki sem slys.

Rannsóknin beinist nú að syni hans, Jonathan Andic, sem var einn á vettvangi með föður sínum þegar slysið átti sér stað.

Í frétt El País segir að ósamræmi hafi verið í framburði Jonathans í skýrslutökum sem vakti grunnsemdir.

Vitnisburður hans hafi ekki samræmst vettvangsrannsókn lögreglu í Montserrat-fjöllunum.

Stirt samband milli feðganna

Í annarri skýrslu frá Estefaniu Knuth, eiginkonu Isaks Andic, kemur fram að samband feðganna hafi verið stirt.

Í yfirlýsingu fjölskyldunnar segir að hún hafi fullt traust til þess að rannsókninni ljúki fljótlega og sakleysi Jonathans verði sannað.

Isak Andic fæddist í Istanbúl og var talinn meðal auðugustu manna Spánar. Forbes metur auð hans og fjölskyldu hans á um 4,5 milljarða bandaríkjadala.

Andic stofnaði Mango í Barselóna árið 1984 og undir hans stjórn óx fyrirtækið hratt og er nú með starfsemi í yfir 120 löndum.

• Blogga um frétt