Eldur kviknaði í farangursrými flugvélar

Farþegaflugvél á vegum Air China lenti heilu og höldnu í Sjanghaí í morgun eftir að það kviknaði í rafhlöðu í handfarangri farþega um borð í vélinni.

Vélin var á leiðinni frá Hangzhou í austurhluta Kína til Incheon-flugvallarins í Suður-Kóreu en henni var snúið við og lenti í Sjanghaí til að tryggja öryggi farþega.

„Það kviknaði sjálfkrafa í liþíumrafhlöðu í handfarangri farþega sem geymdur var í farangurshólfi. Áhöfnin brást strax við samkvæmt verklagsreglum og engan sakaði,“ sagði í yfirlýsingu flugfélagsins á kínverska samfélagsmiðlinum Weibo.

Miðað við myndbönd sem birt hafa verið á samfélagsmiðlum skapaðist nokkur óeirð um borð í vélinni þegar eldurinn kviknaði.

• Blogga um frétt