Sýknuð af ákæru fyrir brot gegn Alþingi

Mikill fjöldi fólks var í Héraðsdómi Reykjavíkur í dag.
Mikill fjöldi fólks var í Héraðsdómi Reykjavíkur í dag. mbl.is/Sigurgeir Sigurðsson

Héraðsdómur Reykjavíkur sýknaði nímenningana svonefndu af ákæru fyrir brot gegn stjórnskipan ríkisins og æðstu stjórnvöldum þess með því að fara inn í Alþingishúsið og upp á þingpallana þar.

Brot gegn því ákvæði hegningarlaganna varðar allt að ævilöngu fangelsi ef það er mjög alvarlegt.

Í dómnum segir, að fólkið hafi hist hjá Iðnó við Tjörnina og lagt þar á ráðin um það að fara inn í Alþingishúsið og upp á þingpallana til þess að mótmæla ástandi í efnahags- og stjórnmálum landsins, krefjast afsagnar ráðherra og aðgerða til úrbóta. 

Til fundarins og mótmælanna var boðað með dreifimiðum á Austurvelli laugardaginn áður á almennum mótmælafundi sem þar var haldinn. 

Héraðsdómur segir, að ekki hafi komið fram nein vísbending um það í málinu að það hafi beinlínis vakað fyrir fólkinu að taka almennt ráð af þinginu eða að kúga það í einstöku máli.  

„Ákærðu, sem voru óvopnuð, fóru í hópi 20–30 manna inn í Alþingishúsið og var förinni heitið á þingpallana (eins og beinlínis er tekið fram í ákærunni) en ekki inn í þingrýmið.  Sem fyrr segir er engin vísbending í málinu um það að ákærðu hafi ætlað sér að aðhafast annað en að láta heyra í sér mótmæli vegna ástandsins í landinu frá þingpöllunum.  Verður með engu móti talið að fyrir þeim hafi vakað að reyna að kúga Alþingi eða að athafnir þeirra geti talist vera sú árás á þingið að sjálfræði þess hafi verið hætta búin.  Ber samkvæmt þessu að sýkna öll ákærðu af ákæru fyrir brot gegn 1. mgr. 100. gr. almennra hegningarlaga," segir í dómnum.

Hópurinn var einnig sýknaður af ákæru fyrir húsbrot og fyrir að hafa í félagi brotið gegn valdstjórninni. Þrjú úr hópnum voru fundin sek um brot gegn valdstjórninni og ein kona var fundin sek um að hafa óhlýðnast lögreglu.

Dómur Héraðsdóms Reykjavíkur

mbl.is

Innlent — Fleiri fréttir

Í gær