34.000 Íslendingar krefjast leiðréttingar

Andrea Jóhanna Ólafsdóttir, formaður Hagsmunasamtaka heimilanna, afhenti Jóhönnu Sigurðardóttur forsætisráðherra undirskriftir rúmlega 34.000 Íslendinga í hádeginu í dag. Þess er krafist að lán heimilanna verði leiðrétt og að verðtrygging verði afnumin.

„Við smíðuðum stól fyrir undirskriftirnar, svokallaðan haka, því að heimilin í landinu hafa setið á hakanum. Þegar forsætisráðherra kom út til að taka á móti undirskriftunum, þá tók hún heimilin af hakanum,“ segir Andrea.

„Forsætisráðherra sagði að þetta yrði fyrsta mál sem tekið verður fyrir á þriðjudagsmorguninn.“

Andrea segir að þess sé krafist að þjóðaratkvæðagreiðsla fari fram hafi stjórnvöld ekki orðið við kröfunni fyrir 1. janúar næstkomandi, Undirskriftasöfnunin hefur farið fram víða, meðal annars á vefsíðu hagsmunasamtakanna og enn er hægt að skrifa undir.

• Blogga um frétt