Björk Guðmundsdóttir hefur verið tilnefnd til Golden Globe kvikmyndaverðlaunanna sem veitt verða í Hollywood 21. janúar. Björk er tilnefnd sem besta leikkona ársins fyrir leik sinn í hlutverki Selmu í Myrkradansaranum, en ásamt henni eru tilnefndar Julia Roberts fyrir Erin Brockovich, Joan Allen fyrir Contender, Ellen Burstyn fyrir Requiem For a Dream og Laura Linney fyrir You Can Count on Me.

Golden Globe verðlaunin eru veitt af samtökum erlendra blaðamanna í Bandaríkjunum. Þau eru nokkurs konar undanfari Óskarsverðlaunanna og oft fá þeir sömu verðlaun á báðum hátíðunum. Því þykir velgengni í Golden Globe vera góð vísbending um góðan árangur á Óskarsverðlaunahátíðinni. Kvikmyndirnar Gladiator, Erin Brockovich og Billy Elliot fengu flestar tilnefningar til Golden Globe en auk þeirra voru myndirnar Sunshine, Wonder Boys og Traffic tilnefndar sem besta myndin. Fyrir bestan leik í karlhlutverki voru tilnefndir Russell Crowe fyrir Gladiator, Javier Bardem fyrir Before Night Falls, Michael Douglas fyrir Wonder Boys, Tom Hanks fyrir Castaway og Geoffrey Rush fyrir Quills. Golden Globe