Björn Bjarnason, dómsmálaráðherra, segir að ástæða sé til að huga því, hvort ekki eigi að setja í lög ákvæði um það, að unnt sé að kæra álit kærunefndar jafnréttismála til æðra stjórnvalds, það er til félagsmálaráðherra.
Björn segir á heimasíðu sinni, að umboðsmaður Alþingis hafi gagnrýnt endanlegt vald nefnda á borð við kærunefndina og telji réttarstöðu borgaranna geta verið betri gagnvart þeim því réttur til málskots til æðra stjórnvalds eigi að vera fyrir hendi. Segir Björn að umboðsmaður og sérfræðingar í stjórnsýslurétti séu sammála um, að veitingarvaldshafi þurfi aðeins að færa rök fyrir því, hvers vegna hann skipar einhvern í embætti, honum sé ekki skylt að fara í mannjöfnuð, þ.e. færa rök fyrir því, hvers vegna hann hafnaði einhverjum umsækjanda.
Björn segir, að meginkrafan á hendur honum í máli fyrir kærunefndinni vegna skipunar hans í embætti hæstaréttardómara, hafi verið að hann skýrði, hvers vegna hann skipaði ekki kæranda, það er konuna, í embættið.
„Ég hafnaði þeirri kröfu alfarið og taldi kröfu um slíkan mannjöfnuð ekki byggjast á lögmætum forsendum. Kærunefndin ber hins vegar saman umsækjendur og telur sig hafa lögheimildir til þess, þótt hún eigi aðeins að leggja mat á það, hvort um sé að ræða kynferðislega mismunun. Ef þessi afskipti af forsendum veitingarvaldshafans rúmast innan jafnréttislaganna, þarf að þrengja rétt kæurnefndinnar og laga hann að almennum stjórnsýslureglum," segir Björn.