„Ég var að koma frá Cannon Street Station þegar ég mætti sjúkrabíl og lögreglubíl á móti mér og sá fólk koma hlaupandi,“ segir Ólafur Elíasson, sem var á leið til vinnu sinnar hjá Alþjóðareikniskilaráðinu í Lundúnum. Ólafur segir að konan sín vinni í Moorgate sem er rétt hjá Liverpool Street Station lestarstöðinni. „Hún var nýkomin á skrifstofuna þegar sprenging varð undir byggingunum sem hún vinnur í. Svo sást fólk koma hlaupandi út úr byggingunni.“
„Þegar ég horfði niður eftir Cannon Street í átt að Bank lestarstöðinni sá ég fólk koma hlaupandi þar upp eftir götunni,“ segir Ólafur. Hann segir að búið sé að loka af svæðinu í kringum lestarstöðinni.
Ólafur segir að fólk virðist vera nokkuð rólegt í borginni þrátt fyrir árásirnar. „Fólk virðist vera að reyna að komast heim eins og er,“ segir Ólafur en bætir við að margra klukkutíma bið sé eftir leigubílum.