Innlent | 24 stundir | 31.5.2008 | 5:30 | Uppfært 8:00

Allar gullplöturnar ónýtar

Söngvarinn Magni Ásgeirsson Eggert Jóhannesson

„Það er „fokkt opp“ að koma heim til sín eftir svona. Það er eins og það hafi verið snargeðveikt partí hérna í viku,“ hrópaði Magni Ásgeirsson rokkstjarna er hann kom heim í húsið sitt í Hveragerði eftir skjálftann. Hann var á Akureyri þegar skjálftinn reið yfir og hafði stuttan tíma í gær til þess að reyna að laga skemmdir áður en hann þurfti að rjúka til Grundarfjarðar þar sem Á móti sól lék á dansleik í gærkvöldi. „Það er allt út um allt. Fólkið við hliðina á mér svaf í hjólhýsi í nótt. Þar er útveggur sprunginn. Þetta fór mun betur en annars staðar. Þetta er ekkert sem vert er að grenja yfir.“

Ljósakrónan í svefnherberginu hrundi á rúmið hans, myndir hrundu af veggjum, 200 geisladiskar dreifðust yfir stofugólfið, rauðvínsflöskur splundruðust á eldhúsgólfinu og sjónvarp sonar hans eyðilagðist.

„Gullplöturnar eru allar ónýtar. Svo opnaðist ísskápurinn þannig að lyktin er frekar sterk og ógeðfelld. Það fór eitt málverk eftir ömmu mína í gólfið en sem betur fer er í lagi með myndina sjálfa. Við getum orðað það svo að rammagerðin á Suðurlandinu muni hafa svolítið mikið að gera á næstunni.“