Vímuefnafíkn er fjölskyldusjúkdómur

„Ég hafði á tilfinningunni að hlutirnir væru að ganga upp. Hún fékk frábæra hjálp frá Vímulausri æsku og Lundi í Keflavík, en það var samt eitthvað sem angraði mig,“ segir Elísabet Markúsdóttir, móðir 17 ára stúlku sem berst við vímuefnavanda. Í næstum fjögur ár hefur hún reynt að gera hvað hún getur til að bjarga dóttur sinni úr viðjum vímunnar.

Stúlkan féll fyrir tveimur vikum og er nú á nýjan leik komin í meðferð. Elísabet segir baráttu síðustu ára hafa tekið gríðarlega á og hræðilegt sé að horfa upp á barn sitt drepa sig á vímuefnum. Skili meðferðin ekki tilætluðum árangri óttast hún að tíminn sé á þrotum. „Hún er að verða átján ára og ég er að reyna að nota þessa síðustu daga til að gera það sem ég get til að hjálpa henni.“

Amfetamínfíkn aðalvandi hjá 13%

Vímuefnavandi íslenskra ungmenna er mikill og til að mynda koma um 4% allra landsmanna á Sjúkrahúsið Vog fyrir tvítugsaldur. Ungmennin fara ekki varhluta af þróun vímuefnaneyslu hér á landi og hefur orðið gríðarleg aukning í neyslu örvandi vímuefna, s.s. amfetamíns, kókaíns og e-taflna. Amfetamínfíkn var aðalvandi 13% ungmenna undir 19 ára sem leituðu sér meðferðar á Vogi á síðasta ári.

Vandinn er þó ekki aðeins þeirra, og fjölskyldur ungra fíkniefnaneytenda þjást ekki síður, enda fíkillinn oftast nær með öll vopnin í höndum sér. Kristín Snorradóttir, móðir 21 árs fíkils í meðferð, vill sjá meira gert fyrir aðstandendur. „Ég sem móðir hef verið á þeim stað að vanlíðanin og sorgin hefur verið svo mikil að ég hef varla staðið undir mér. Þetta er fjölskyldusjúkdómur og mér finnst það oft gleymast.“

Báðar mæður lofa starf Foreldrahúss þar sem þær hafa fengið mikinn stuðning og hvetja aðstandendur til að sækja aðstoð þangað og það fremur fyrr en síðar.